Хыналдада — юбилейлиг тудуглар

Чүс чылче базымнар

Республиканың Баштыңы ажыл хүнүнүң төнчүзүнде юбилейлиг тудугларда ажылды хынап барып турар. Дүүн ол кол-кол тудугларга база катап чораан. «Чаңгыс чер-чурттугларым, ажылдың темпизин кошкатпазы чугула! Найысылалдың оруктары экижээн – деп, ол Вконтактыда бодунуң арынында бижээн. – Бөгүн база тудугларга чордум. Ажыл хайныышкынныг. Тудугжулар эртен эртеден орай кежээге чедир кызып ажылдап турар-дыр».

Тудугжулар үш ээлчеглиг ажылдап турар. Сентябрь байырлалдарының кол эртер чери Улуг-Хемниң эрик кырынче кичээнгей дыка улуг. Даши Намдаковтуң кылганы «Хаан аңнаашкыны» деп экспозицияны Кызылда эккелген, ону тургузарының белеткел ажылдары дооступ турар.

Сергей Пюрбю аттыг Улусчу чогаадылга бажыңының даштыкы хевири болгаш девискээри дыка көрүштүг апарган. Ооң девискээрин бүрүнү-биле асфальтылаан.

Найысылалдың төп кудумчулары чаарттынган. Автотранспорт аргыжылгазы берге турган Чүлдүм кудумчузун алгыткан, машиналар тургузар черни кылган. Ам ол машина-балгат чоруурунга эптиг апарган. Чазак Бажыңы, хөгжүм-шии театры, «Найырал» кино театры, «Өңнүк» магазини турган бажыңның чоогу шуут өскерилген. Ол девискээрге машиналыг, чадаг аргыжарынга дыка эптиг, хевири чараш апарганын чон демдеглеп турар.

А бо демир херимнерниң каасталгаларын чамдык кижилерниң ушта ээрип, оора долгап турары хомуданчыг.

Долаана САЛЧАК.