Yрер хөгжүм байырлалы

Тыва биле Россияның демнежилгезиниң 100 чылынга тураскааткан «Азия төвүнде фанфарлар» деп үрер хөгжүм оркестрлериниң 2-ги делегей чергелиг фестиваль-конкурузунга белеткел ажылдары дооступ турар. 

Тыва Республиканың Чазааның үрер хөгжүм оркестриниң эгелээшкини-биле  2012 чылдың сентябрьда 1 дугаар делегей чергелиг мындыг фестиваль-конкурс РФ-тиң Культура яамызының болгаш Тыва Республиканың Чазааның деткимчези-биле эрткен. Ынчан хүндүлүг аалчыларның аразында делегейниң оркестрлер конференциязының база марштаар оркестрлерниң Азия чемпионадының президентизи Кенонг Хуангтың (Тайвань) кээп чорааны төөгүлүг, уттундурбас болуушкун болган.

Yрер хөгжүм оркестрлериниң 2-ги делегей фестиваль-конкурузунуң тургузукчулары – Москваның культура болгаш уран чүүл университеди, Россияның Камгалал яамызының Төп шериг оркестри болгаш ТР-ниң Чазаа.

Июнь 4-6 хүннеринде фестиваль-конкурска киржири-биле Азия, Америка, Европа чурттарындан болгаш Россияның аңгы-аңгы регионнарындан хөгжүмчүлер Кызылга чыглыр. Амгы үеде фестивальдың оргкомитединиң кежигүннери кээп киржир болган аалчылар-биле харылзажып, белеткел ажылдарын кидин түлүк чорудуп турар. Бо удаада фестиваль-конкурска АКШ, Венгрия, Япония, Моолдан болгаш Россияның Москва, Екатеринбург, Красноярск, Абакан, Минусинск, Саяногорск хоорайларындан хөгжүмчүлер кээр. Тывадан — ТР-ниң Чазааның үрер хөгжүм оркестри, Тываның күрүне филармониязының, Кызылдың  уран чүүл колледжизиниң, Р.Кенденбиль аттыг уругларның уран чүүл школазының, К.Тамдын аттыг уругларның чогаадыкчы лабораториязының хөгжүм- чүлери киржир. Фестиваль-конкурс үезинде  семинарлар, мастер-класстар, ажык кичээлдер эртер.

2012 чылда Национал театрның баарынга ат-сураглыг оркестрлер аразынга бистиң ТР-ниң Чазааның оркестри ойнай бээрге, кайы хире чоргааранчыг болган ийик. А каттышкан оркестрлерни дирижерлар элчип-селчип башкарып турда, ТР-ниң алдарлыг артизи Тимур Дулуш кайы хире-даа улуг оркестрни төлептии-биде үдеп шыдаарын көргүскен болгай. Хөгжүмчүлеривис чедиишкиннерлиг болзун деп йөрээп каалыңар.

Светлана Дачын-Хөө.