Тываның Баштыңы Белгородче атканының соонда, когараан улустуң төрээн болгаш чоок кижилеринге кажыыдалын илереткен

Майның 12-де, кежээ Украинаның чепсектиг күштери Белгородче кара өжегерээн агаардан халдап, аткан. Чуртталга бажыңынче снаряд-биле дорт атканындан, ооң бир подъездизи  буступ дүшкен. Тываның Баштыңы Владислав Ховалыг республиканың хөй националдыг чонунуң мурнундан Белгородтуң чурттакчыларын база Белгород облазының губернатору Вячеслав Гладковту деткээн сөстерни дамчыткан. 

- Белгород ам база агаардан дорт халдаашкынга таварышкан. Украинаның чепсектиг күштериниң адыышкынындан он-он тайбың чурттакчылар когараан. Ракета-биле ам база адып болурунуң дугайында чаа дыңнадыглар бар болганындан, камгалал ажылдарын чорудары нарыыдаан. Белгородтуң когараан чурттакчыларының төрээн кижилеринге база чоок улузунга, областың губернатору Вячеслав Владимирович Гладковка Тываның хөй националдыг чонунуң мурнундан деткиишкинниң сөстерин илередип тур мен - деп, Тываның Баштыңы бодунуң блогунда бижээн.

Россияның Истелге комитединиң дыңнатканы болза, УЧК талазындан Белгород база Белгород районунче тускай сорулгалыг халдаашкынга хамаарыштыр кеземче херээн оттуруп, истелгени эгелээн.

"УЧК талазындан Белгород база Белгород районче кара өжегерээн адып турарын күүсекчи эрге-чагырга органнары дыңнаткан. Россияның Истелге комитединиң истекчилери кеземче херээн истеп тура, бо кем-херек үүлгедиишкининге хамаарылгалыг шупту кижилерни илередип тывар хемчеглерни чорудар" – деп, ол дыңнадыышкында бижээн.

Украинаның Чепсектиг күштери «Точка-У» ракеталарны база «Ольха» база «Вампир» чазылдырар от системазын ажыглап, областың төвүнче адып турарын, РФ-тиң Камгалал яамызы дыңнаткан.