2024 чылда Тываның үш девискээри дөрткү салгалдың мобильдиг харылзаазын алыр

«Ростелеком»-нуң Тываның Чазаа-биле дугуржулгазы езугаар, республиканың кожууннарында 4-кү салгалдың мобильдиг харылзаазын болгаш дүрген дамчыыр интернетти хандырар бааза станцияларының четкизин немей салып турар. 2024 чылда Мөңгүн-Тайга кожууннуң Тоолайлыг, Бии-Хемниң Ленинка суурларга, ол ышкаш уругларның дыштанылга лагерьлери база турисчи баазалар мөөңнеттинген Чагытай хөл эриинге оларны тургузар.

Тываның Чурагай хөгжүлдезиниң яамызы 2023 чылда ажыл-чорудулгазының дугайында отчедун берип тура, харылзааның чаа объектилериниң дугайында дыңнаткан. «Чурагайның дең эвес чоруун чайладыры 2.0» федералдыг төлевилел күүселдези-биле организастаан республиканың чурттакчы чонунуң бадылаашкын түңнелдеринге даянып, станциялар тудар черлерни тодараттынганын сагындыраал.

Дүрген дамчыыр мобильдиг интернет киирер төлевилелче ниитизи-биле 1370 кижи чурттакчылыг ыраккы Качык, Ырбан, Хүт, Тал, Ийме суурлар ооң мурнунда чылын шилиттинип, ону боттандырган. Оон аңгыда, харылзаа чок турган Ак-Даш, Кызыл-Тайга база Куран биче суурлар соталыг харылзаа-биле хандырттынган. Турисчи ийи девискээр – Дус-Хөл хөлде база «Алдын-Булак» комплекс чоогунда тускай чагыларны тургускан.

Чагытайда база Ленинка, Тоолайлыгда чаа станцияларны ажылдатканындан, республикада соталыг харылзаа ажыглалының зоназы 93 хуу чеде берген. 152 чурттакчылыг черлерниң 141-и – соталыг харылзаалыг. Чедери берге чүгле 6 суурда 2G стандарттыг харылзаа бар, а арткан 133 суурлар 4G хевирниң дүрген дамчыыр четкизинде , 132,7 муң кижи, азы шупту өрегелерниң 98 хуузу коштунган.

Эрткен 10 чылдың дургузунда, Тывада шупту 408 социал ужур-дузалыг объект, ооң санында 172 школа, 80 библиотека, 89 ФАП, 108 көдээ чагырга черлери, 8 өрт кезээ Интернет четкизинде коштунган. Чедери берге 10 суурда спутник харылзаазы ажылдап турар. Республиканың 70 чурттакчылыг черлеринде амгы четкилерни 2023 чылда эде чаарткан, мобильдиг интернеттиң дүргени 25 хуу өскен, а ооң ажыглалы 30 хууга көвүдээн.