16.01.2024
Сөөлгү ийи чылда Тывада суггарылга системаларын катап тургузар ажылдар идепкейжээн. Россияның Президентизи Владимир Путинниң «Делегей кооперациязы болгаш экспорт» национал төлевилелиниң деткээни «АҮК продукциязын экспорттаары» регионалдыг төлевилел суггарылга системаларының инженер-техниктиг дериглерин катап тургузар ажылды чорудуп турар.
Тываның Баштыңы Владислав Ховалыг республика девискээринде суггарылга системаларын катап тургузар ажылды күштелдирип, көдээ ажыл-агый угланыышкынныг октаттынган черлерни чогуур байдалче киирерин регионалдыг Көдээ ажыл-агый яамызындан база чагырга даргаларындан негээн.
Федералдыг деткимче-биле республиканың мелиорация комплекизин катап тургузарын каш катап дүргедеткен.
Тываның Көдээ ажыл-агый яамызының медээзи-биле алырга, бо чылын Барыын-Хемчик, Чеди-Хөл база Каа-Хемде суггарылга системаларын катап ажылдадыр, Барыын-Хемчик, Бии-Хем, Чеди-Хөл база Каа-Хем кожууннарга культуртехниктиг хемчеглерлиг 5 төлевилел деткимчени алган.
Тарылгага ажыглаар шөлдерни бок үнүштерден, даш-когурум база боктан аштап арыглаары культуртехниктиг хемчеглерде кирген. Ведомствонуң үнүш ажыл-агый болгаш механизация килдизиниң начальниги Эртине Монгуш төлевилелдиң ниити өртээ 80 млн рубль деп дыңнаткан.
Улуг ажылды кылган соонда, экспорттаар продукцияны бүдүрүп эгелээр. Бо чылдың май-июньда 1500 гектар ажыг черге көдээ ажыл-агый культураларын тарыыры планнаттынган, 203 гектарга кызыл-тасты, 326 гектарга арбайны, ол ышкаш суланы база хөй чылдыг сигеннерни тарыыр.
Эрткен чылын беш кожуунга 6 культуртехниктиг хемчеглерни боттандырган, регионда улуг суггарылга системазы – «Малиновскаяны» эде чаарткан. Бо чылын «Малиновская» системазын ажыглап эгелээрге, Бии-Хем кожуунда 304 гектарда тарылга болгаш сиген шөлдери суггаттыг черлер апаар. Ол черлерден ниитизи-биле 270 тонна тараа культразының дүжүдүн алырын тус чер чагыргазы санаан.