Тыва Республиканың Баштыңының грантызынга «Тывалар» деп ховар фотоальбомну парлап үндүрер

Тыва Республиканың Баштыңының грантызын хуваап-үлээр комиссия конкурстуң культура болгаш уран чүүл адырында түңнелдерин үндүрген.

Конкурска культура болгаш уран чүүл адырында боттарын ажыл-биле хандыртынганнар, хуу сайгарлыкчылар база киришкен. Фотограф Василий Балчий-оол конкурска тиилээн, ол грант акша-хөреңгизи-биле «Тывалар» деп фотоальбомун парладып үндүрер дээн төлевилелин боттандырар. Конкурстуң тиилекчизи альбомунга Моолда база Кыдатта этниктиг тываларның хүн бүрүде амыдыралын көргүзер. Тываларны бот-тускайлаң чон кылдыр шинчилээринге база таныжарынга материал апаар тываларның ховар дээн материалдыг культура өнчү-салгалын үндүрүлгеден көрүп болур.

Комиссия кежигүнериниң бодалы-биле алырга, «Тывалар» деп фотоальбом Тываның төөгүзүнде бир арынны ажыдар. Сенгел база Кыдат тываларының, даш-чонукчуларның өңгүр чараш фоточуруктары Тываның аалчыларының база хөй чоннуң кичээнгейин хаара тудар.

Комиссия оон өске ийи төлевилелди база деткээн. Культура адырында бодун ажыл-биле хандыртынган автор Алдынай Бурун-оолдуң тыва улустуң тоолдар антологиязы база «Тоолдар өртемчейи» деп чуруктуг номнарын парлаарынче деткимчени берген. Бо номнар аныяк салгалдың номчулгаже сонуургалын оттурар эки арга болур.

Тыва Республиканың Культура яамызының социал-чогаадыкчы чагыының акша-хөреңгизинге деткимчени алган ийиги төлевилел – автор Марк Чоодунуң республиканың чонар-даш уран чүүлүнге тураскааткан «Тываның амгы үеде чонар-даш уран чүүлү» деп сувенирлиг фотоальбомун үндүреринче акша-хөреңгини берген.

Мастерлерге, уран чүүл шинчилекчилеринге, калбак номчукчуларга, туристерге улуг сонуургалды болдурган Тываның ус-чогаадыкчы уран чүүл мастерлериниң ховар дээн брендизи – Тываның чонар-даш уран чүүлүн бедик шынарлыг парлалга продукциязы таварыштыр нептередири – бо төлевилелдиң кол сорулгазы.