Тываның профэвилелдер федерациязы республиканың ажылчы чонунуң эргелерин камгалаар адырда эки өскерлиишкиннерни демдеглээн
02.05.2023
Тыва Республиканың Чазааның даргазының оралакчызының албан-хүлээлгезин күүседип турар Орлан Сарыглар Тыва Республиканың Профэвилелдер федерациязының даргазы Галина Сюрюн баштаан кежигүннер-биле ужурашкан. Ийи тала республиканың ажылчы чонунуң эргелерин сагып турарынга амгы байдалды, бюджет адырының ажылдакчыларын база “Ада-чурт камгалакчылары” күрүне фондузунуң ажыл-чорудулгазын база тускай шериг организациязының киржикчилериниң өг-бүле кежигүннерин деткиир хемчеглерни организастаарын сайгарып чугаалашкан.
Санкциялыг ыйыдыышкыннар уржуундан нарын социал-экономиктиг байдал турзажок, 2022 чылда республика шалың төлевиринге өрелерни бүрүнү-биле дуглап, күш-ажыл төлевириниң кудуку хемчээлин 2 катап өстүрген (2022 чылдың январь 1-ден - 8,6 %, 2022 чылдың июнь 1-ден - 10%), ажыл чок чоруктуң деңнели – 9,5% болган (2021 чылда –15%, 2020 чылда – 18%), 18 эмчи ажылдакчызынга албан бажыңнарын берген, бөгүнде 10 эмчиниң чурттаар чер хөлезилээн чарыгдалын бюджеттен компенсастап, 1252 эмчи ажылдакчыларынга коммунал ачы-дуза дээш чарыгдалын эгидип, аныяк башкыларга «Мен – башкы мен» регион программазы-биле “көвүдеткен” акшаларны төлеп, ажылдыг хамаатыларны деткиири-биле республиканың эрге-чагыргазы өске-даа хемчеглерни ап турарын, Профэвилелдер федерациязының төлээлери демдеглээн.
«Күш-ажылдың чөптүг төлевири, төлептиг ажылчын олуттар, бүдүрүлгеде айыыл чок чорук – профэвилелдерниң кады туржур ужурлуг чаңчылчаан сорулгалары-дыр» - деп, Тываның профэвилелдер федерациязының даргазы Галина Сюрюн демдеглээн.
Профэвилелдер кежигүннери эмчи ажылдакчыларының база социал хандырылга албан черлериниң ажылдакчыларының күш-ажыл төлевиринге, “Күш-ажылдың хоочуну” атты алырын таарыштырган федералдыг хоойлужудулгаже, ажылче кирерде база ажылдап тургаш эмчи шинчилгезин эртеринге төлевир чурумунче өскертилгелерни киирерин, муниципалдыг албан черлериниң ажылдакчыларынга санаторлуг-курорт эмнээшкининге тус чер бюджединден акша-хөреңгини аңгылаарынга база өске-даа айтырыгларга хамаарышкан санал-оналдарын киирген.
«Бөгүн профэвилелдер федерациязының кииргени шупту санал-оналдарын республиканың чазаа өөренип көргеш, бистиң ажылчы чонувустуң эрге-ажыы дээш нормативтиг-эрге-хоойлу актыларынче өскертилгелерни киирерин чедип алыр бис» - деп, Орлан Сарыглар ужуражылганы түңнеп чугаалаан.
Тыва Республиканың Профэвилелдер федерациязының составында эвилелдиң 40,2 муң ажыг кежигүннерин хаара туткан, 8 адырның республика албан черлери бар. Республиканың профэвилел кежигүннериниң, организациялар болгаш бүдүрүлгелер ажылдакчыларның социал-күш-ажыл эргелерин болгаш социал сонуургалдарын төлээлеп, ону камгалаары – эвилелдиң кол сорулгазы.
Возврат к списку
|