Тываның Баштыңының шиитпири-биле регионнуң хүрээлерин республиканың Камбы-Лама эргелелиниң өнчүзүнче шилчиткен

Тываның сарыг шажынында төөгүлүг болуушкун болган – регион баштыңының шиитпири-биле, элээн каш билдингир хүрээлерни –шупту оран-савазы болгаш чоок чыдар девискээри-биле Кызылда Цеченлинг хүрээзин, хем ол чарыында "Туптен Чойхорлинг" дуган-хүрээни, Чөөн-Хемчикте "Үстүү-Хүрээ" хүрээ комплекизин республиканың Камбы-Лама эргелелиниң өнчүзүнче халас дамчыткан. Бо үеге чедир ол объектилер республиканың өнчү-хөреңгизи турган.
Владислав Ховалыг эргелелдиң төлээлери-биле ужуражылгада, өнчү ээзиниң документилерин тыпсып, Россия – сүзүк чүдүлгелиг күрүне, хөй национал чоннуг, хөй адыр шажынныг Тыва, чоокта чаа-ла православ Пасханы, ооң бичии-ле мурнунда Навруз байрам байырлалын демдээглээни - аңаа бадыткал деп, демдеглээн. Камбы-Лама эргелелиниң өнчүзүнче буддизм философиязының шажын төптерин шилчиткени, чон ортузунга чырыдыышкын ажылын хөгжүдүп, кижиниң чаагай чоруу дээш оон-даа ыңай ажылдаарынга идигни бээр дээрзинге бүзүрелин илереткен:
"Чонга дээш туткан хүрээлерны лама башкылар боттары ээлеп, шажын өөредиин өөредип, нептередир ужурлуг деп санаар мен. Буддизм философиязын сайзырадырынга база чырыдыышкын ажылын чорударынга бо базым чаа эргилдени бээр боор” –деп, ол дыңнаткан.
Тываның Камбы-Ламазы Гелек Нацык-Доржу регионда шажынны деткип, бо базымны кылганы дээш, лама башкыларның өмүнээзинден четтиргенин илереткен:
«Хүрээлерниң документилери биске турарын дыка үр чылдарда манап келдивис. Сарыг шажынны деткип турарыңар дээш, четтирдивис. Удавас бистиң чүдүкчүлеривистиң шажынчы өөредилгезиниң төвү апаар, үрде манаанывыс «Тубтен Шедруб Линг» чаа хүрээ ажыттынар, ону база хөгжүдүп, сайзырадып, деткиир бис».
1997 чылда Тывага Камбы-Ламы эргелели тургустунган. Шажын организацияларының өнчүзүнче хүрээлер, чер участоктары, бүдүрүлге, социал, ачы-буян, культура-чырыдыышкын болгаш өске-даа сорулгалыг объектилер, шажынчы дериг-херекселдер, акша-мөңгүннер, хүрээлерниң ажыл-чорудулгазын хандырар эт-хөреңги, төөгү болгаш культура тураскаалдары кирерин федералдыг хоойлужудулгада айыткан.