Тыва үер соонда оруктар септелгезинче акшаландырыышкынны алыр регионнар санынче кирген

25.02.2023 Тыва Республика үер соонда оруктар септелгезинче акша-хөреңгини алыр 8 регионнуң санынче кирген. Федералдыг Чазак ол сорулгага ийи миллиард рубль акшаны тускайлаан. Ооң дугайында Россияның Чазааның албан езунуң интернетте курларлавыры дыңнаткан.
“Сес регион үер соонда оруктарын катап септеп-селииринге акша-хөреңгини алыр. 2023 чылда чазак 2 млрд рубльди үерден когараан регионнарже чорудар. Бо акша-хөреңги регионнарның, муниципалдар аразының болгаш тус черниң автооруктарын септээринге көрдүнген” – деп дыңнаткан.
РФ-тиң Чазааның даргазы Михаил Мишустинниң ат салганы айтыышкыны ёзугаар Крым, Тыва республикалар, Забайкалье, Хабаровск крайлар, Амур, Иркутск, Омск областар, Еврей автономнуг округ акшаландырыышкынны алыр. Эрткен чылын РФ-тиң Чазаа сугга алыскан автооруктарны септээринче ийи миллиард рубльди тускайлаанын демдеглээн.
Тыва 2022 чылда ол сорулгага аңгылаан федералдыг акша-хөреңги-биле суг үеринден үрелген, онза айыылдыг эң берге байдалда көвүрүглерни - Өвүрде Чоза, Барыын-Хемчикте Аянгаты хемнерни кежир, ол ышкаш Мөңгүн-Тайгада көвүрүглер септээринче угландырган. Ол объектилерде эрткен чылын эгелээн ажылдар бо чылын доостур.