Тывадан ээлчеглиг гуманитарлыг чүъктү тускай шериг операциязының зоназынче чоруткан
28.12.2022
Тускай шериг операциязының киржикчилеринге дузаламчы көргүзер республиканың каттышкан штавынга, республика чурттакчыларының Тывадан шериглерге дээш чыгганы ачы-дуза чүъктүг улуг самолет Кызылдың аэропортундан бо дүне ужуп үнүпкен. Тываның Баштыңы Владислав Ховалыг биле Төп шериг округунуң шериг командылакчызының оралакчызы, генерал-майор Рустам Миннекаев-биле дугуржулга езугаар, гуманитарлыг чүък самоледун чорудар арга тывылган. Оларның ужуражылгазы, декабрь эгезинде, Тываның Баштыңы Донбассче ажыл-албан аайы-биле чорда болган.
Тыва Республиканың Чазааның даргазының оралакчызы Тимур Куулар баштаан бөлүк чүъктү чедиргеш, чедер черинге посылканы апаар. Тускай шериг операциязының зоназынга гуманитарлыг дуза чедирер арга-дуржулгалыг апарган ТР-ниң националдар херээниң талазы-биле агентилелдиң удуртукчу Владимир Хабаров, «Тува-24» телеканалдың корреспондентизи Сайгын Бюрбю делегацияда кирген. Ол ышкаш Тыва Республиканың Улустуң хөөмейжизи Андрей Монгуш биле Чаан мөге Андрей Хертек бөлүк-биле аъттаныпкан.
ТШО мурнуку шугумунче Тывадан бирги гуманитарлыг чүъктү чер транспорту-биле чедирген турган. Бо удаада республиканың чурттакчылары, организациялары, сайгарлыкчылары 40 хире тонна аъш-чем аймаан, чылыг хептерни, бирги хереглел хереглелдерин, эм-таңны база техника дериг-херекселдерин чыгган, ол ышкаш дайынчыларның чоок болгаш төрээн кижилери шериглерниң аттарынче посылкаларны чоруткан.
Улуг чүък самоледу ээлчеглиг партияны алыр болганы-биле, мурнуку одуругже шимчеп чоруур техникаларны база чүдүрүп аъткарган. Гуманитарлыг чүък-биле кады, Тывадан дайынчыларның шериг кезектеринге ажыглаар кылдыр УАЗ биле ЗИЛ автомобильдерни дамчыдып чоруткан.
Чаа чыл бүдүүзүнде чорудуп турар эң кол чүък – республиканың көдээ ишчилериниң күжү-биле чыгган доңурган эъттер болур. Республиканың каттышкан штавының кежигүннери Чаа чылдың белээ кылдыр доңурган хой эъдин тыва дайынчыларга чорудуп бээр инициативаны идип үндүрген турган. Тываның Көдээ ажыл-агый болгаш аъш-чем яамызы, республиканың муниципалдыг тургузуглары база малчын ажыл-агыйлары-биле эът чыылдазын организастаан. Кызылда штаб мөчүлерни адырып, эъттерни хаптап, чорударынга чедир шыгжаар улуг ажылды организастаан.
Республиканың яамылар база ведомстволар коллективтеринден, Тываның Чазаандан эрлер, волонтерлер, хөй-ниити организацияларының кежигүннери база 55-ки мото-адыгжы бригаданың шериглери самолеттуче гуманитарлыг чүъктү чүдүреринге дузалашкан, регион штавы дыңнаткан. Арткан гуманитарлыг дузаламчыны улуг чүък машиналары-биле чорудар деп, республика штавының кежигүннери шиитпирлээн. Республиканың энерел сеткилдиг чурттакчыларындан, дайынчыларның чоок болгаш төрээн кижилеринден Чаа чылдың шупту посылкалары чогуур адрестеринге ынчаар чеде бээр.
«Чаңгыс чер-чурттугларывыска четтирдивис! Республиканың чаңгыс аайлаан штавынче посылкаларны чедиришкен кижилерге база четтидивис. Бөгүн автомашина-биле эътти база посылкаларны дораан чорудуптувус. Чүъктү дыка дораан чүдүржүпкен эки турачыларга база өөрүп четтиргенимни илередип тур мен. Кижи бүрүзү бодунуң үлүүн киириштирген. Шупту кады – күш бис!» - деп, Тываның Баштыңы Владислав Ховалыг бодунуң блогунда бөгүн бижээн.
Возврат к списку
|