Тыва Российжи ном эвилелинден Өөрүп четтириишкин бижиин алган
06.12.2022
Россия Федерациязының субъектилер аразынга чарлаттынган “Эң номчуттунар регион” деп бүгү-российжи мөөрейге Тыва Республика киришкеш, Өөрүп четтиришкин бижиинге төлептиг болганын ТР-ниң Культура яамызы дыңнаткан. Бистиң чуртувуста сес дугаар эртип турар мөөрейге РФ-тиң 82 субъектизи киришкен.
Регионнар 2021-2022 чылдарда боттандырган боттарының эң улуг ужур-уткалыг литературлуг төлевилелдерин таныштырган. А.С. Пушкин аттыг Национал библиотеканың ажылдакчылары шииттирген ада-иелер база оларның ажы-төлү-биле ажылдарже угланган “Авам номчуп турар, ачам номчуп турар” деп төлевилели-биле Тываны төлээлээн. Бо социал төлевилел Президентиниң грантылар фондузунуң мөөрейинге тиилеп каарга, библиотеканың ажылдакчылары Тываның библиотекалар каттыжыышкыны база Россияның кеземче херээн күүседир федералдыг албанның Тыва Республикада эргелели-биле кады ону боттандырган.
Төлевилелдиң организаторлары чэрби беш шииттирген кижилерни шилип алгаш, тода номчуурунга өөредип, номнарны номчуткан. Видеога тырттыргаш, оон роликтерни белеткээн. Өг-бүле номчулгазының ачызында, кеземче херээн эрттирип турар кижилерниң боттарының ажы-төлүнге кичээнгейи оттуп, ынакшылын илередип, өг-бүле харылзаазы тургустунган.
«Төлевилел киржикчилериниң уруг-дарыынга видиобижимелдерни дамчыдып бээри дыка девиденчиг болган» – төлевилелдиң боттандырыкчызы чугаалаан. Тываның Сүт-Хөл, Чөөн-Хемчик, Улуг-Хем, Эрзин, Тес-Хем, Чеди-Хөл база Кызыл кожууннарга чедип, 1500 километр орукту эрткен. Марафон үезинде киржикчилерниң ажы-төлүнге номнар, чигирсиг белектер-биле кады флешкаларны берген.
Республиканың Культура яамызы Тыва Республиканың социал ужур-уткалыг литературлуг төлевилели российжи Ном эвилелинден Өөрүп четтириишкин бижиин алганын дыңнаткан.
2022 чылда «Россияның литературлуг тергиидекчизи» атты Новосибирск облазы алгаш, мөөрейниң тулган тиилекчизи болган. Ульяновск, Воронеж, Иркутск, Белгород областар, Санкт-Петербург, Саха (Якут) Республика аңгы-аңгы чылдарда “Россияның литературлуг тергиидекчизи” аттарны чаалап алган. Эрткен чылын ол атка Архангельск облазы төлептиг болган.
Жюри кежигүннери тиилекчини илередирде, эрге-чагырга органнарының болгаш культура албан черлериниң ном болгаш номчулга инфраструктуразын хөгжүдер инициативаларын, чедиишкиннерин өөренип көрген. Россияда чоннарның культурлуг өнчү-салгалының чылында, регионнарның үндезин чоннарының чогаал ужур-чаңчылдарын нептередип, кадагалаарынче угланган төлевилелдер онза черни ээлеп, номчулга инфраструктуразының дугайында статистиктиг көргүзүглерже кичээнгейни немей хаара туткан.
Возврат к списку
|