Тываның чурттакчыларынга база аалчыларынга ТАР-ның 100 чылдаанынга делгелгени белеткээн

Найысылалдың чурттакчылары база аалчылары республиканың чүгле эрткен төөгүзүн эвес, а ооң амгы үезин база чуруктардан таныжар аргалыг болган. Делгелгеде амгы фоточурукчуларның ажылдары, XIX-XX чүс чылдарда Тывага кээп чораан аян-чорукчуларның төөгүлүг чуруктары бар. Эң бирги ужар-хеме база чүък машиназы, Кызылдың алгы заводу, 1930 чылдарның кызыл шөлү, пионержи кыстар, фронтуга дээш даараан алгы тоннар – бо бүгүнү Алдан-Маадыр аттыг Национал музейниң өң чок фоточуруктарындан көрүп болур. 

Оон аңгыда Александр Ензак, Василий Балчый-оол, Арслан Аракчаа, Май-оол Чооду, Валерий Иргит, Аржана Кенден, Танаа-Херел Кенден-Хуурак, Алексей Арестов база Владимир Монгуштуң ажылдары делгеттинген. 

Амгы салгалдың объективинден бөгүнгү Тыва ук-дазылын болгаш төөгүлүг эрткен оруун кадагалап, бүрүнү-биле өскерилгенин, келир үеже бүзүрелдиг көрүжү-биле таныжып болур.Фоточуруктарда төөгүлүг болгаш культурлуг хемчеглерни, ат-сураглыг кижилерни, күрүне ажылдакчыларын, хүреш, ча адары дээш, өске-даа чүүлдерни көргүскен. 

Делгелгени «Алдын скиф» коммерциялыг эвес культура фондузу биле Тываның Чурукчулар эвилели организастаан.