Тываның Баштыңының албан-хүлээлгезин күүседип турар Владислав Ховалыг сугга алыскан черлерге четкен
29.05.2021
Тываның Баштыңы албан-хүлээлгениң түр када күүседикчизи Москвадан ужуп келген дораан, Каа-Хем кожуунче бар орукта Көк-Тей деп черде сугга алыскан участок чоогунда көвүрүгге четкен.
Улуг көвүрүг чоогунда асфальтылаан орук участогунда Каа-Хемниң суу көдүрлүп үнүп келгенинден автоаргыжылганы түр када доктааткан.
"Чонум-биле чугаалажып, боттары кандыг-бир хөделиишкин кыла бербейн, серемчилелин бичии-даа кошкатпазын диледим. Ол участокта камгалакчылар чогуур техниканы хаара тудуп алган, дүн-хүн дивейн ажылдап турарлар. Аргажок херектиг кижилерни, хемниң ол чарыындан өске талазынче кежирип турар.
Республиканың Көдээ ажыл-агый болгаш аъш-чем, Экономика, Кадык камгалал яамыларының удуртукчулары кожуунда аъш-чемниң база кывар-чаар материалдарның курлавырны 2-3 неделяга чедер деп илеткээн. Ындыг болзажок, даглар бажында харлар ам-даа эрип бадарындан, сугнуң деңнели оон-даа көдүрлүр. Суг айыылынга алзып болур кожууннарга бирги хереглелдиң бараннарын, кывар-чаар чүүлдү, эм-таң аймааның артыкшылдыг курлавырын мөөңнеп, херек эмчи дузазын организастаарынга ам неделя хире үе бар.
“Онза байдал үезинде эшкедеп, дүвүревейн, республиканың чогуур албаннары база тус чер чагыргалары-биле кады ажылды шын организастаары - эң кол” – деп, Владислав Ховалыг демдеглээн.
Возврат к списку
|