Тывада өрт айыылының сезону эгелээн

Бойдус курлавырлары болгаш экология яамызының медээзи-биле алырга, ниити план езугаар арга-арыг өрттерин өжүреринче Бойдус яамызының, ХК база ОБ албанының, тус чер бот-башкарылга органнарының, арга-арыг фондузунуң участоктарын хөлезилээн кижилерниң база заповедниктерниң 195 санныг техниказын, 552 кижини хаара тудар. 

«Авиа-арга-арыг камгалалы» ТР КАА-ның парашют-десант өрт албанын арга-арыг өрттерин үезинде тып, ону өжүреринче эвилелдээр. Чүгле ужуп чедер арга-арыгларда өрттерни өжүрери-биле холбашкан ужудуушкуннуг ажылдарже ПДПС-тиң шупту ажылдакчыларын чөпшээрээн.

Ук албанның ажылдакчылары эмчи шинчилгезин, тарыышкыннарны эрттип, зачеттер болгаш шылгалдаларны дужааган, ол ышкаш марттың 31-де СУ-Р-ниң дузазы-биле МИ-8 вертолетту бадырарынга агаарга белеткелдерни эрткен. 

«Арга-арыг өртчүзү» дээш белеткелди болгаш өөредилгени эрттирип, өрттен арга-арыгны черден камгалаар станцияның хууда составын 100 хуу четчелээн. Өртчүлерниң арга-арыг өрттеринге удур техниказы 99,2 хуу белен.