14.01.2021
«2015 чылда эгезин алган шупту социал төлевилелдер эки түңнелдерни берген болгаш, ам-даа уламчылаар. «Аныяк өг-бүлеге кыштаг” - оларның эң чедиишкиннии. 2021 чылдан эгелеп ол төлевилелди кысказы-биле «Кыштаг» деп адаарын чарладым. Төлевилелге ийи ажы-төлдүг, 35 хар чедир назылыг аныяктардан аңгыда, суур черлерде чаңгыс чер-чурттугларының идегелин чаалап алган, ажыл чок, 36 хардан 55 хар назылыг кижилер киржип болур» - деп, республиканың удуртукчузу Шолбан Кара-оол 2021 чылда кылыр ажылдар дугайында Дээди Хуралга бээр айыткалында дыңнаткан.
Тыва Республиканың Баштыңының даалгазын удуртулга болдургаш, республиканың 17 муниципалдыг тургузугларынга чоннуң чыыштары эрттип, төлевилелге киржир кылдыр 84 өг-бүлени шилип алган. Ынчап кээрге киржикчилерниң 80 % шилиттинген деп, республиканың Көдээ ажыл-агый яамызы дыңнаткан.
Шилиттинген 84 киржикчиниң 8-зи 36-дан 55 хар назылыг. Каа-Хем кожууннуң Суг-Бажы биле Бүрен-Хемден 2 , Тере-Хөл кожууннуң Эми суурдан 1 база Чөөн-Хемчик кожууннуң Ийме, Хөндергей, Чыргакы суурлардан эң хөй киржикчилер шилиттинген. Эрзин кожуунуң Эрзин биле Мөренде 2 кижи бар.
Арткан 76 киржикчи – шупту аныяк өг-бүлелерге санадыр. План езугаар Бай-Тайга кожуун 7, Таңды кожуун – 8 өг-бүлени шилиирлер. 5 муниципалдыг тургузуг: Эрзин – 6 киржикчиниң 5-жин, Чеди-Хөл – 5-тиң 4, Мөңгүн-Тайга – 3 –түң 2-зин, Өвүр 6-ның 5-жин, Сүт-Хөл – 7-ниң 5-жин шилип алган.
10 муниципалдыг тургузуг: Каа-Хем – 7, Тере-Хөл – 4, Чаа-Хөл – 4, Улуг-Хем – 9, Барыын-Хемчик - 8, Тес-Хем – 7, Бии-Хем - 3, Тожу – 2, Чөөн-Хемчик – 10, Кызыл – 9 өг-бүлелерни төлевилелге киржир кылдыр шилип дооскан.