Тываның Баштыңы Шолбан Кара-оол «Күзелдер шивижигежи» бүгү-российжи акцияга киришкен
29.12.2020
Тываның Баштыңы Шолбан Кара-оол «Күзелдер шивижигежи» деп чаңчыл болу берген бүгү-российжи акцияга киришкен.
«Инициатива бистиң Президентивис Владимир Владимирович Путинге хамааржыр – деп, Шолбан Кара-оол чугаалаан. – Бистер, улуг кижилер, Чаа чыл бүдүүзүнде тоолчургу, кайгымчык чүүлдер манаан чаштарның күзелдерин боттандырарынга ооң ачы-буянныг үлегерин алдывыс».
Акция амыдыралдың берге байдалынга таварышкан, өскүс уругларны деткииринче угланган. Тываның Баштыңы Шолбан Кара-оол шивижигештен бичии уругларның күзелдерин бижээн “чагаажыгашты” дүжүрген.
4 харлыг Хорагай Хомушкунуң чем кылыр черлиг ойнаар-кыс күзээн күзели чаптанчыг. «Онзагай-дыр. Албан тып бээр бис” – деп, республика баштыңы хүлүмзүрээн.
7 харлыг Ксения Доржукай «Ты супер» төлевилелдиң тиилекчизи Ай-Кыс Кыргыстың канчаар белеткенип турарын көрүксээн. «О, Ай-Кыс Кыргыс-биле өңнүктер бис. Ону организастаары меңээ берге эвес, күзелдиим-биле кылыр мен» - деп, Шолбан Кара-оол чугаалаан.
17 харлыг Оолчук Ооржак Тыва Республиканың Баштыңындан спорттуң дайынчы хевирлеринге мастер-класс алыр күзелин бижээн. «Күзелдиим-биле» - деп, Шолбан Кара-оол чугаалаан.
Ноутбук күзээн 10 харлыг Сайзана Ондар, гитаралыг болуксаан 11 харлыг Жугдержав Эренчин база Тываның Баштыңындан белектерни алыр.
Возврат к списку
|