Российская газета: Тываның Баштыңы РФ-тиң чырыдыышкын сайыды-биле ужурашкан

Ол социал четкилерде бодунуң арынында мынчаар дыңнаткан. 

- Сергей Сергеевич Рособрнадзорну удуртуп турган үелерден бээр эш-хуу эки харылзаавыс бар болгаш, чырыдыышкын сайыды-биле чугаавыс чогумчалыг болду. Бистиң байдалывысты, Тываны эки билир, республикага чаңгыс эвес катап кээп, дузалажып чоруур. Сайыт Тываның өөредилге болгаш эртем яамызының чаартынган составын деткиирин аазады. Россияның Чырыдыышкын яамызы ковид айыылының амыр эвес бо үелеринде херектиг методиктиг дузаны көргүзеринге белен. Өөредилге чорудуу берге-даа болза, ооң шынары – бөгүнде эң кол айтырыг ол. Ынчангаш республикага практиктиг дузаны көргүзер кылдыр арга-дуржулгалыг специалистер бөлүүн чорударын дугуруштувус. Эртемнер башкыларынга ырактан өөредириниң билиг-мергежилин бедидер курстарны организастаар болду. Ындыг деткимче дыка херек. Федералдыг яамы тудугга шыңгыы негелделер талазы-биле, школалар чедишпес дээн ышкаш чидиг айтырыгларывысты дыка эки билир. Национал төлевилелдер программаларын кады күүседирин канчаар чедип алырын база чугаалаштывыс. Ниитизи-биле, бистиң республикага Сибирь деңнелдиг хемчегни эрттирерин дугуржуп алдывыс - деп, Шолбан Кара-оол чугаалаан. 

Республиканың баштыңы сайыт-биле ужуражылгада, национал төлевилелдер чорудуу-биле объектилер тудуушкунунда тургустунган чидиг айтырыгларны база айыткан. 825 олуттуг ниити өөредилге школазының, 280 олуттуг үш уруглар садтарынга-ла база ийи ясли корпустарының тудуунга немелде акшаладырышкынны тускайлаарының аргазын чугаалажып көрген. Оларны тудуп доозарынга ниитизи-биле 305,1 млн рубль херек.