Тываның Баштыңы коронавирус-биле байдал экижээн-даа болза, серемчилелдиг болурунче чурттакчыларны кыйгырган

 “Ковид инфекциязының кол согуушкунун ажып эрттивис. Бөгүн аараан 35 таварылганы илереткен, халдавыр чавырлып турар. Ындыг болзажок суларап болбас. Кадык камгалал яамызы бо таварылгада, сөөлгү ийи айда халдавырдан камгалап келгени аарыг кижилерин план езугаар хүлээп, эмнелгеже чыттырып эгелээр херек” - деп, социал четкилерде бодунуң арынында бижээн. 

Ооң чугаазы-биле алырга, эмчилер хоочураан аарыгларлыг кижилерже онза кичээнгейни салыр ужурлуг. 

“Бүгү республикада тускай стационарлар база поликлиникалар штаттыг ажылынче кирип, планныг хүлээп алыышкыннарны эгелеп, чурттакчы чоннуң диспансер шинчилгезин чорудуп, профхыналдаларны эрттирип, чаа сезоннуң тарылгаларын үе шаанда кылып ужурлуг. Коронавирусту аар эрткен кижилерге реабилитация ажылын абаза эгелээр” – деп, Кара-оол немээн.

 Тываның Баштыңы ооң-биле чергелештир, халдавырны нептеретпезинге эң-не дээштиг профилактика - кижи бүрүзүнүң хууда харыысалгазында дээрзин ол сагындырган. ”Халдавырга удур хууда айыыл чок чорукту сагыыры эң-не дээштиг профилактика ол болурун кижи бүрүзү билген турары эң чугула деп тайылбырлаар херек, чаңгыс чер-чурттуглар. Ол дээрге масканы кедери, чугаалажып турар аразында ыраан сагыыры, хууда арыг-силигни тудуп, улуг кижилерниң, чоок улузунуң, уругларның кадыы дээш онза серемчилелдиг болуру-дур” – деп, ол айыткан.