«Айыыл чок болгаш шынарлыг автомобиль оруктары» национал төлевилелдиң Кызыл хоорайда күүсеттинип турарын хынаан
27.05.2020
Тыва Республиканың орук-транспорт комплекизиниң сайыдының оралакчызы Шораан Чыргал-оол Тыва Республиканың орук-транспорт комплекизиниң ажыл-чорудалгазының талазы-биле Хөй-ниити чөвүлелиниң даргазы Сергей Белоусов-биле кады «Айыыл чок болгаш шынарлыг автомобиль оруктары» национал төлевилелдиң күүсеттинип турарын хынаан.
Кежик Дандааның даалгазы-биле «Айыыл чок болгаш шынарлыг автомобиль оруктары» национал төлевилелдиң чорудуун неделя санында хынап турар.
Бо неделяда удуртукчулар «Суугу» КХН орук тудуг организациязының Щетинкина-Кравченко кудумчузунда кылып турар тудуг ажылдарын хынап көрген.
2020 чылдың май 18-те бо орук участогунда ажылдар эгелээн. «Суугу» КХН-ниң кол инженери Иван Ондар: «План езугаар ажылдар чоруп турар. Объектиде 22 орукчу база 10 тускай техника хаара туттунган. Оруктуң узуну 450 метров, калбаа 12 метр болур. Чогуур орук демдектерин салыр. Орукту асфальты-биле шыварын бо чылдың июнь 10-да доозар бис» – деп чугаалаан.
«Ажылдың түңнели амдан көскү – элээн каш дилинтектиг болур орукту калбарткан, ам орукчулар орук кыдыының бордюрларын, тротуарларны салып турары бо. Графикти сагып, асфальт чаткан соонда, хоорайның бо кезээнге чугула херек орук чырыдылгазынче кирерин «Суугу» КХН-ге чагыдым» - деп, Шораан Чыргал-оол чугаалаан.
«Суугу» КХН, «Восток» КХН, «Орук тудуг-транспорт» бүдүрүлге кооперативи дээн ышкаш харыысалгалыг тудугжулар «Айыыл чок болгаш шынарлыг автомобиль оруктары» национал төлевилелдиң күүселдезинде хаара туттунганын сагындыраал.
ТР-ниң Орук-транспорт комплекизиниң яамызы
Возврат к списку
|