Тываның Баштыңы Кызыл кожуунга «муниципалдыг шакты» эрттирген
29.05.2019
Май 27-де, Тываның Баштыңы Шолбан Кара-оол Кызыл кожууннуң активи-биле ужуражып, муниципалдыг шакты эрттиргеш, кожуун хөгжүлдезиниң айтырыгларын сайгарган.
Бот-идепкейлиг болгаш шудургу удуртукчу шын тургускан кадрлар политиказы-биле үре-түңнелди чедип алыр деп, республика баштыңы чугула айтырыгны көдүрген. Республика деңнелинче депшиир кылдыр хевирлеттинген кадрлар курлавырынче чедиишкинниг болгаш харыысалгалыг удуртукчу кирер.
Кызыл кожуун 32553 чурттакчылыг, а Каа-Хем суурда – 18695 кижи чурттап турар. Ынчангаш тус чер чурттакчыларының чаагай чоруунуң, Сукпак, Көк-Тейде база садчылар ниитилелинде чурттап турар чонга социал болгаш эмчи ачы-дузазын чедингир болдурарының айтырыглары чидии-биле тургустунганын регионнуң баштыңы сагындырган. Мурнады боттандырар хемчеглерде республика найысылалының чоогунда чыдар кожуун төвүнде спортчу-культура төвүнүң, хөй каът бажыңнар болгаш өске-даа ужур-дузалыг объектилер тудуу дээш, хөгжүлдениң өске-даа айтырыглары киргенин Шолбан Кара-оол тайылбырлаан.
Суурнуң шапкын хөгжүлдезинге идигни бээр инвестиция төлевилелдерин аңаа боттаныр. Хоорай тудуунуң бөдүүн нормаларын сагывайн, социал объектилер-даа чок кылдыр кайы хамаанчок туттунган Каа-Хем суур чер хамаарылгазында чидиг айтырыгны тургузуп, электри чырыын оорлаарынга чедирген деп, Тываның Баштыңы айыткан.
Шолбан Кара-оол кожууннуң экономиктиг политиказын чиге хевирлээр айтыышкынны берген. Хоорай долгандыр агрокуржагны хевирлеп турда, муниципалдыг эрге-чагырга чоннуң орулгалыг кезээн хандырар дээш кандыг хемчеглер алганыл, база хоорай чурттакчыларын көдээ ажыл-агый продуктулары-биле хандырар дээш чүү кылдынганын айтырган.
Ол болгаш өске-даа чугула айтырыглар чугааның өзээн тургузуп, кол угланыышкыннарда кады чорудар ажылдарны тодараткан.
Возврат к списку
|