Тываже демир-орукту тудар дугайында организастыг хурал Абаканга болуп эрткен
09.04.2019
Элээн каш стратегтиг транспорт төлевилелдериниң эң колу – Курагино-Кызыл демир-оруун тудар төлевилелди боттандырарының чорудуун чугаалашкан хурал Красноярскиниң демир-оруунуң Абакан регионунда офизинге болуп эрткен.
Камгалал яамызының кезектери биле Россияның демир-оруктарының 80 хире удуртукчулары киришкен хемчег үезинде, төлевилел документациязының айтырыгларындан аңгыда, орукту өске чурттарже үнер кылдыр тударын делгереңгей тайылбырлаан.
«Тываже демир-орукту тудар чиңгине тудугжуну тодараткан үеден бээр чүгле неделя эрткен-даа болза, бөгүн Абаканга ооң тудуун кылыр шупту кол черлерниң чыыжы эрткен. Ажыл-херектер боттуг үе-чадаже чоорту, бүзүрелдиг шимчеп эгелээн» – деп, Шолбан Кара-оол бодунуң блогунда бижээн.
Ажылдарның хемчээли дыка улуг дээрзин Тываның Баштыңы демдеглээн. Камгалал яамызының кезектери биле Россияның демир-оруктарының 80 хире удуртукчузу хуралдың ажылынга киришкен. Оларның аразында демир-орук шериглериниң кол эргелелиниң начальниги, генерал-лейтенант Олег Косенков, Россияның демир-оруктарының вице-президентизи Виктор Зимин, Красноярскиниң демир-оруктарның начальнигиниң хүлээлгезин күүседип турар Алексей Туманин бар.
«Хуралда, бир дугаарында, техниктиг айтырыгларны база төлевилел документациязын сайгарып көрген. Ооң-биле чергелештир, стратегтиг темаларны база көдүрген. Орукту улаштыр өске чурттарже үнер сорулга-биле тудуп эгелээрин допчу тайылбырлаан» – деп, Шолбан Кара-оол бижээн.
Май эгезинде Кызылга ол талазы-биле дараазында хуралды эрттирер.
Возврат к списку
|