26.01.2018
РФ-тиң Президентизиниң чарлыы езугаар, 2018 чылдың январь 1-ден төрүттүнген бирги чаштарга ай санының төлевир акшазынче хамаатылардан билдириишкиннерни үе шаанда алырынга шупту негелделерни хандырарын Тываның Баштыңы Шолбан Кара-оол социал албан черлеринге сүмелээн. Чылдың эге хонуундан тура, республикада 75 чаштар төрүттүнген.
«Чуртта эң-не хөй чаштар төрүттүнүп турар бистиң Тывага РФ-тиң Президентизи В.В. Путинниң эгелээшкини дыка үнелиг, ынчангаш ону чогуур деңнелге күүседир ужурлуг бис. Чаа төрүттүнген чаштарның ада-иелеринден төлевирлерже билдириишкиннер озалдаашкын чок, үе шаанда кирер ужурлуг. Оон башка билдириишкин киирерин чартык чыл озалдадыр болза, төлевирни чаштың төрүттүнген хүнүнден эвес, а чагыгны бүрүткээн хүнден эгелеп төлээр деп хоойлуда айыткан. Кожуун чагыргалары биле социал камгалал килдистери «президентиниң» пособиезин канчаар алырын шупту алыкчыларга тодаргай тайылбырлап бээрин даастым» - деп, Шолбан Кара-оол бодунуң блогунда бижээн.
Владимир Путинниң ат салганы хоойлуда, 2018 чылдың январь 1-ден бирги уруу төрүттүнген өг-бүлелерге регионда амыдырап-чурттаарының уругларга тургускан кудуку хемчээлинге дең ай санының немелде пособиезин төлээри көрдүнгенин сагындыраал. Россияда ол түң ортумаа-биле 10500 хире рубль. Амыдырап-чурттаарының кудуку хемчээлинден ортумак орулгазы 1,5 катап көвүдевес өг-бүлелерге чаа төлевирни төлээр болгаш уруг 1,5 харга четкижеге ону бээр.
2017 чылдың декабрь 28-те хүлээп алган «Ажы-төлдүг өг-бүлелерге ай санының төлевирлериниң дугайында» № 418-ФХ федералдыг хоойлунуң күш киргени-биле, Тыва Республиканың Баштыңының 2018 чылдың январь 22-де даалгазын күүседир дээш, Өг-бүле болгаш уруглар херээниң талазы-биле агентилел «Чурттакчы чонга дыңнадырының дугайында» ведомствонуң дужаалын үндүрген.
2018 чылдың январь 23-те, агентилелдиң ажылдакчылары төлевирлер дугайында тайылбырларны дараазында албан черлериниң: Перинаталдыг төп, Республиканың уруглар эмнелгези, Хоорай поликлиниказы, Уруглар поликлиниказы, Республиканың СПИД-ке болгаш халдавырлыг аарыгларга удур профилактика төвү, Кызыл хоорайның херээженнер консультациялары, Уруглар бажыңы, Республиканың кеш аарыглар диспансери, Кызыл хоорай мэриязының социал хөгжүлде департаментизи, Кечил-оол кудумчузунда Тыва Республиканың девискээирнде күрүне болгаш муниципалдыг ачы-дуза көргүзер хөй талалыг ажыл-чорудулгалыг төптүң албан езузунуң сайтыларында, информастыг самбыраларда салган. Хамаатыларга 700 ажыг буклеттерни үлээн.