Тываның Баштыңы оруктарда байдалдарны хынаарын дааскан
04.07.2017
Тывада эрткен дыштаныр хүннерде чагган суггур чаъстар республиканың өске черлери-биле ыраккы Мөңгүн-Тайганы харылзаштырган кара чаңгыс чазаглыг оруктуң элээн участогун үрээн.
Даглар ийинден агып баткан чаъс суу 200 метр хире орукту үрээнинден, ында улуг чалдар тыптып келген. Июль 1-де орукчулар септелге ажылдарын эгелээн, ындыг болзажок чиик машиналарга орук ам-даа хааглыг.
Тываның Баштыңы Шолбан Кара-оол ТР-ниң орук-транспорт комплекизиниң сайыды Олег Бадыга ук ажылдарны боду хыналдага алырын дааскан. Шолбан Кара-оол бодунуң блогунда арга-арыг өрттери-биле демиселге суггур чаъстар дузалаан болза, ам оруктарда шаптараазыннарны ол тургусканын бижээн.
«Мөңгүн-Тайга кожууннуң арт кырында оруктуң участогун суг үрээн. Дүүнден ында сетелге ажылдары чоруп турар. Оюп эртер орукту база үстүрген. Республика оруктарының ындыг участоктарын боду хыналдага алырын орук-транспорт комплекизиниң сайыды О.О. Бады хүлээндирдим» – деп, Контактыда ол бижээн.
Хандагайты – Мугур-Аксы авторуунуң үрелген ол участогунда 10 ажылчын база 6 санныг техника ажылдап турарын ТР-ниң Орук-транспорт яамызы дыңнаткан. Специалистер когаралдың түңүн санап турар. Орук ажылдары доозулгуже олче угланыышкынныг чоруктарны шеглээрин орукчулар сүмелээн.
Возврат к списку
|