Тываның иштики херекер сайыды Александр Лобанов республиканың Баштыңы Шолбан Кара-оолга Найырал орденин тывысканы-биле байыр чедирген

 Май 24-те Кремльге Россия Федерациязының күрүне шаңналдарын тыпсыр езулал эрткен. Эртем, үлетпүр, культура, кадык камгалал болгаш спорт адырында үжен хире шылгараңгай российжилерге орденнер болгаш хүндүлүг аттарны тывыскан. 

 Тыва Республиканың Баштыңы Шолбан Кара-оолга база элээн каш регионнарның губернаторларынга бедик күрүне шаңналдарын тывыскан. Россияның Президентизи Владимир Путин «күш-ажылчы чедиишкиннери, идепкейлиг хөй-ниити ажыл-чорудулгазы дээш» Найырал ордени-биле регионнуң удуртукчузун шаңнаан. 2017 чылдың январьда ол дугайында чарлыкка атты салган.  

 Тыва Республиканың иштики херектер сайыды Александр Лобанов Тываның Баштыңы Шолбан Кара-оолга күрүне шаңналын тывысканы-биле байырны чедирген:

  «Хүндүлүг Шолбан Валерьевич! Тыва Республиканың Иштики херектер яамызының коллегиязының, удуртулгазының, бүгү хуу составтың база бодум өмүнээмден Силерге Найырал орденин тывысканы-биле байыр чедирип тур мен! Тыва Республиканың чаагай чоруу дээш, ооң социал-экономиктиг курлавырын боттандырарынга чугула шупту чүүлдерни кылырынга, чоннар болгаш шажыннар аразында эп-найыралды кадагалаарынга, кижилерниң амыдырал-чуртталгазын экижидеринге профессионал арга-дуржулгаңар, ажыл-агыйжы болгаш амы-хууда мөзү-бүдүжүңер-биле эки ажылдап чоруур Силер. Силерниң амыр эвес база харыысалгалыг ажылыңарга чүрээм ханызындан чедиишкиннерни күзедим. Хүндүткел-биле, сайыт, полицияның генерал-майору А.Ф. Лобанов»