Тоора-Хем суурда дизельдиг электри станциязын септээш, чырыкты катап берген
24.04.2017
Тыва Республиканың Одалга болгаш энергетика яамызы Тожу кожууннуң төвү Тоора-Хем суурда электри энергиязын долузу-биле берип эгелээнин дыңнаткан.
Нижний Новгородтан "ЭнергоТрансМаш-НН" КХН биле ХПМЭС подстанцияның тыва бөлүүнүң специалистери дизельдиг кол станцияның башкарылга блогунда үрелиишкиннерни чайлаткаш, апрель 23-те чырыкты берген. Суурнуң чырык хандырылгазында аварийлиг байдал уржуунда курлавыр генератордан чырыкты графиктеп берип турган.
"Апрель 23-те 13 шактан эгелеп Тоора-Хемде чырык хандырылгазын доктаамал берип эгелээн. Шупту объектилерде чырык бар. Амгы үеде специалистер башкарылга болгаш атоматиканың шупту шкафтарын дарый чаартыр сорулга-биле үрелик чүүлдерин илередип турар» - деп, одалга болгаш энергетика сайыдының оралакчызы Валерий Очур дыңнаткан.
Тоора-Хемде совет үеде-ле салган шупту генераторлар боттарының курлавырын ийи катап эрттир ажылдап каапканын яамының специалистери дыңнаткан.
Тыва Республиканың Баштыңы Шолбан Кара-оолдуң даалгазы-биле, Тожуда чаа дизельдиг электростанцияны тудуп үндүрер талазы-биле тудуг ажылдары амгы үеде чоруп турар. Эрткен чылын регионнуң чазаа чаа станцияны садып алыр дугайында шиитпирни хүлээп алган. 1000 кВт күчүлүг дизель-генераторну саткаш, Тоора-Хемниң дизельдиг электристанциязында салган.
Возврат к списку
|