Тываның Баштыңы көдээ ажыл-агый бүдүрүкчүлеринге дузалаар акша-хөреңгини чазак ам-даа тыварын чугаалаан
10.03.2017
Март 9-та Тываның Баштыңы Шолбан Кара-оол журналистер-биле ужуражылгазын регион база муниципалдыг массалыг информация чепсектериниң редакторлар клувунуң хуралы хевирлиг эрттирген. Регионнуң удуртукчузу Москвага сургакчылаашкынының түңнелдерин таныштырып, журналистерниң айтырыгларынга харыылаан.
Көдээ ажыл-агыйын деткээн субсидия кызырлып болур дугайында медээ редакторларны сонуургаткан. Ынчангаш республика баштыңы Россияның көдээ ажыл-агый сайыды Александр Ткачев-биле дарый ужуражырын планнап турар. Планнаан бюджет кызырылдазындан Тыва когаравас деп сайыт чугаалаан, ындыг болганда деткимчеге идегеп болур. Оон аңгыда, көдээ ажыл-агый барааннарының бүдүрүкчүлеринге, ылаңгыя көдээ чонга дыка херек «Аныяк өг-бүлеге кыштаг» база «Чемгерикчи инек малым» губернатор төлевилелдериниң киржикчилеринге дузалажыр акша-хөреңгини республика боду тыптынар. Чазак деткимчениң оон-даа өске хевирлерин – «Заря» эът комбинадының тудуунга (инвестицияның 70 хуузун республика бодунга алган) ажыглаттынганы ышкаш, күрүне-хуу эштежилгени ажыглаарын көрүп турар.
«Төлевилелди бут кырынга көдүрүп кээринге белен сайгырлыкчы бар, шак ындыг арга-биле Сесерлигге сүт-бараан фермазын ажыдар бис. Бодунуң бизнезин сайзырадырынга сонуургалдыг хуу ээзи чок, Ильинкада ферма ышкаш КУБ-тар болгаш МУБ-тардан үнер херек. Эштежип ажылдаар ындыг харыысалгадан кортпас сайгарлыкчылар дыка эвээш, бистиң көдээ ажыл-агый яамызындан ындыгларны тыварын негедим» - деп республика баштыңы чугаалаан.
Возврат к списку
|