Россияның кызыгаар тудуу «Хандагайты (Россия) – Боршоо (Моол)» эрттирилге пунктузун эде чаартып эгелээр

 Россияның кызыгаар тудуунуң удуртукчузу Леонид Бершанский Тываның эрге-чагыргазы төлевилелди эгелээриниң дыка хөй ажылдарын кылганын Чазакка демдеглээн. «Бөгүн Хандагайты дугайында чугаалап тура, аңаа бистиң кичээнгейивис онза херек. Ол угланыышкынны хөгжүдер херек. Бо чылын Хандагайты-Боршоо эрттирилге пунктузунче акшаландырыышкынны тускайлаан. Майга чедир хуусаа иштинде төлевилелдиң күүселдезин ылавылап, эде тудуушкун ажылдарын эгелээр. Россияның кызыгаар тудуу национал хевир-шинчилиг, модульдуг болгаш мобильдиг эрттирилге пунктузун кылырын шиитпирлээн» - деп, Леонид Бершанский демдеглээн. 

 Тываның Баштыңы Шолбан Кара-оол Леонид Бершанскийге өөрүп четтиргенин илереткеш, Россияның кызыгаар тудуунуң шиитпири республикага улуг ужур-дузалыг дээрзин демдеглээн. Хандагайтыже М-54 федералдыг орукту эде угландырганы - амгы үеде Моол-биле тургустунган садыг-экономиктиг харылзааларга таарымчалыг байдалды тургузуп турарын ол демдеглээн. Тываның даштыкы-биле садыг-саарылга эргилдезиниң кол кезии «Хандагайты – Боршоо» каайлы эрттирилге пунктузу таварыштыр чоруп турар. 

 Хандагайтыже федералдыг орукту шилчиткени-биле холбаштыр, тус черниң контроль-эрттирилге пунктузун хөй талалыг эрттирилге пунктузу кылдыр эде чаартыры Тываның кожа-хелбээ Сибирь регионнары база Моол-биле харылзааларын чаа чадаже үндүрер. Алызында барып М-54 оруктуң чаа угланыышкыны Азия чурттарынче трансконтинеталдыг транспорт шугумун тургузарынга үндезин болур. 

 «Россияның кызыгаар тудуунуң удуртукчузу Леонид Бершанскийден эки медээни алдывыс: Хандагайты каайлы пунктузунга делегей чергелиг эрге-байдалды тыпсыр дээш ооң эде тудуушкунун эгелээринге беленин бо хүн хуралга дыңнатты. База ол ажылдарны чыл дургузунда доозар деп. Федералдыг орукту эде угландырар төлевилел уламчылаар, республиканың сайзыралынга чаа аргалар ажыттынар. Россияның Чазаа, Россияның Транспорт яамызы-биле хөй чылдарда кады ажылдажылгавыс чедиишкинниг болганынга өөрүп тур мен, Бистиң планнарывыстың чаа чадазының боттаныышкыны ол» - деп, Тываның Баштыңы ужуражылганың түңнелин бодунуң блогунда бижээн. 

  Тайылбыр:  

 Россия Федерациязының Чазааның 2015 чылдың апрель 17-де № 678-р айтыышкыны-биле бадылаан, 2015-2025 чылдарда Тыва Республиканың социал-экономиктиг хөгжүлдезинче угланган хемчеглер планында «Хандагайты» автомобиль эрттирилге пунктузун эде чаартыры кирген. 

 Россия Федерациязының Чазааның 2015 чылдың сентябрь 14-де №975 доктаалы езугаар Хандагайты – Моол-биле күрүне кызыгаары («Хандагайты» КЭП) автооруктуң участогун Россия Федерациязының өнчүзүнче хүлээткен болгаш, 2017 чылдың январь 1-де ол доктаал күш кирген.  

 РФ-тиң Чазаанче Хандагайты эрттирилге пунктузун хөй талалыг чурумга ажылдаар кылдыр шиитпирлээринге деткимчени көргүзер дилегни Тыва Республиканың Чазаа 2016 чылдың ноябрьда киирген.  

 Кызыл хоорайда Моолдуң чиңгине төлээ чери Моолдуң Чазаа 2017 чылда «Боршоо» эрттирилге пунктузун эде тудары-биле кызыгаар инфраструктуразын чаартырынче углаар чээлини алырынга беленин, Тываның Чазаанга 2017 чылдың февраль эгезинде дыңнаткан.