Хоочуннар аразынга хол бөмбүүнге маргылдаазы
27.05.2013
Эрткен дыштаныр хүнерде Тээли суурга хоочун хол бөмбүкчүлериниң ортузунга «Төрээн кожуун» деп республика чергелиг маргылдаа болуп эрткен.
Аңаа республиканың аңгы-аңгы булуңнарында ажылдап-чурттап чоруур хоочун херээжен спортчулар – бай-тайгажылар киришкен. Мөңгүн-Тайга, Улуг-Хем, Чөөн-Хемчик, Сүт-Хөл, Барыын-Хемчик кожууннардан болгаш Бай-Тайгадан ийи команда күжүн шенешкен. Маргылдааның ажыдыышкынынга кожуун чагыргазының даргазының оралакчылары Лидия Хертек, Жанна Аракчаа, спорт чөвүлелиниң даргазы В.И.Баавыл олар 1960-70-80 чылдарда ойнап чораан хоочун спортчуларга байыр чедиргеш, суй белектерни сөңнээн.
Ийи хүн үргүлчүлээн маргылдааның түңнелинде улуг-хемчилер тиилекчи болган. Ийиги черни Барыын-Хемчиктиң хоочуннары, үшкүзүн Бай-Тайганың № 1 командазы ээлээн. «Эң эки аарыкчы» тускай шаңналды бо хүннерде малчын Светлана Донгаковна Даржаа, Кызылдан анестезиолог эмчи Самба Санчыевич Доо, Тээлиде уругларның болгаш элээдилерниң спорт школазының ажыл-агый эргелекчизи Чайлаг-оол Кымзаевич Төре база ус-шевер мастер Киров Түлүшович Хунан олар чаалап алган.
Маргылдааның деткикчилери хууда сайгарлыкчы Петр Монгуш, аптека эргелекчизи Татьяна Таргын, херээженнер чөвүлелиниң даргазы Сайлык Уртунай, кежээки школаның директору С.Д.Сүге-Маадыр эң эки халдакчы, эң эки камгалакчы дээш, тус-туста шаңналдарны тывыскан. Оларга спортчулар өөрүп четтиргенин илереткен.
Шеңне Куужаан.
Возврат к списку
|