Тывада «Кадыкшылдың маршруду» губернатор төлевилели уламчылавышаан

 Таңды кожууннуң чурттакчылары «Кадыкшылдың маршруду» губернатор төлевилелиниң күүселдези-биле бо чылын бир дугаарында эмчи дузазын алганнар. Эмчилерниң көжүп чоруур комплекстиг бригадазы Балгазын биле Бай-Хаак суурларның чурттакчыларын дөрт хүн дургузунда шинчээн.  

 Аарыг кижилер невролог, онколог, кардиолог, офтальмолог эмчилерге шинчидип, маммография, УЗИ-ни эртип, ТР-ниң Кадыкшыл төвүнүң специалистеринге бүдүн организмин хынатканнар. Онкологтуң хүлээп алыышкынынга 100 хире кижи кирген, оларның 5-инге онкодиспансерге хандыр эмчилээрин сүмелээн. Ол-ла хире кижини невролог, офтальмолог шинчээн. Кардиолог эмчи 150 кижини шинчээш, оларның хөй кезииниң ханының базыышкыны улуг, чүрээниң шыңганнары аарыг дээрзин бадыткаан. УЗИ специалистериниң хүлээп алганы 70 кижизиниң хөй кезии хоочураан панкреатит биле холециститтиг болган. 

 ТР-ниң Кадыкшыл төвүнүң специалистери Таңды кожууннуң 35 хар чедир назылыг чурттакчыларын калбаа-биле шинчээн. 250 кижиниң ханында холестерин болгаш глюкозаның деңнелин хынап, кардиовизор-биле чүрээн шинчип, спирограмма дузазы-биле өкпезиниң байдалын шинчээн. Эмчилер шинчээн соонда, кадыын камнаар талазы-биле кижи бүрүзүнге аңгы сүмелерни берген. 

 Онколог эмчи биле УЗИ специализи кожууннуң узун назылыг чурттакчызы, күш-ажылдың хоочунун бажыңынга барып шинчээн. Кызыл хоорайга улаштыр эмчилээр бижикти аңаа берген.

 «Кызылдан эмчилер келгенинге дыка өөрүп тур бис. 90 харлаан, узун назылыг, ырак чер чедип шыдавас бистиң ававысты бажыңга келгеш, шинчээни эки боду. Солагай талакы быктым аарып тур дээр апарган кижи» - деп, ооң оглу чугаалаан. 

 Кожууннуң өске суурларының чурттакчы чону база тускай эртемниг эмчилерге шинчидип алыр аргалыг болган. Келген кижилерниң чамдыызы диспансеризацияны эрткени ол. 

 Эртине Монгуш эмчилерге шинчидип алганы дээш өөрүшкүзүн чажырбаан: «Бо чылын диспансеризация эртер кижилер бөлүүнде кирген мен, ынчангаш кардиолог эмчиден шинчидип эгеледим. Эмчи чүрээмде кандыг-даа кем чок деп чугаалады. Хөй номчуттунар болгаш, караам четпестээн болду, карак-шили кедер рецепт бижип берди. Ам неврологка кирер мен. Аңгы-аңгы специалистерниң келгени эки-дир».