Тываның Баштыңы регионга уруглар пособиезин төлээриниң чаңгыс аай үезин тургузарын негээн
02.08.2016
Регионнуң удуртукчузу шак ындыг даалганы Өг-бүле болгаш уруглар херектериниң талазы-биле агентилелге берген.
«Сөөлгү үеде уруглар акшазын кандыг-даа чылдагаан чокка саададып төлеп турар апарган. Ынчангаш Өг-бүле болгаш уруглар херектериниң талазы-биле агентилелге уруглар пособиезин төлээр чаңгыс аай үени – ай санында 1-ден 3-түң хүнүнге чедир бүгү муниципалдыг тургузугларга үлээн турарын чедип алыр. Кожууннарның саң-хөө килдистери акша-хөреңгини үезинде шилчидип, доктаттынган хүннерде төлээн турарын негеп тур мен» - деп, Шолбан Кара-оол негелдени тургускан.
Республика Баштыңы социал четкилерде бодунуң арыннарындан аңгы-аңгы айтырыгларлыг чагааларны ап турарын чугаалаан.
«Эрге-чагырганың шиитпирлээри социал уткалыг чугула болгаш чидиг айтырыгларже онза кичээгейни салыр кижи мен. Бодумнуң оралакчыларымга база сайыттарга боттарының харыысалгазы-биле ол айтырыгларны шыңгыы хыналдага алырын даастым» - деп, Шолбан Кара-оол сагындырган.
Возврат к списку
|