Тываның Баштыңы Шолбан Кара-оол найысылалда ээлчеглиг уруглар садының тудуун хынаан
22.07.2016
Тываның Баштыңының хүлээлгезин күүседип турар Шолбан Кара-оол Кызыл хоорайның солагай талакы дачалар девискээринде уруглар садының тудуун хынаан.
Тудуг материалдары-биле бүрүн хандырттынган-даа болза, тудугжулар графиктен озалдап ажылдап турарын, аңаа четкеш эскерген. Хыналда-контроль кошкак-дыр дээш, тудуг сайыдын база Кызылдың мэрин шүүмчүлеп, чайгы эки үени эрттирбези-биле, ажылдың темпизин дүргедедирин негээн.
«Кызыл хоорайның солагай талакы дачалар районунда инфраструктура айтырыы чидиг-даа болза, чаа уруглар садын аңаа тударын чедип алган мен. Чүге дизе, ол чоок-кавының уругларынга ол дыка херек. Дачаларда кижилер доктаамал чурттап турар болганда, Кызылдың эрге-чагыргазы оон караан дестирген херээ чок. Ынчангаш оларга бүгү байдалдарны тургузар апаар. Бөгүн тудугну хынап чордум. Шупту чүүлдер бар, а ажыл шүшпең чоруп турар-тыр. Шалыпкын ажылдаарын дугуруштувус!» - деп, Шолбан Кара-оол соцчеткилерде бодунуң арнында бижээн.
Кызылдың солагай талакы дачалар районунда 160 уруг хүлээп алыр уруглар садын тудуп турарын сагындыраал.
Возврат к списку
|