Майның 21-де 12 шакта Кызылдың Арат шөлүнге Будданың төрүттүнген хүнүн байырлаар

 Майның 21-де, ай санаашкыны-биле 15 хүнүнде, бүгү делегейниң буддистери Будда Шакьямуниниң төрүттүнген хүнүн демдеглээрлер. Төөгүден алгаш көөрге, ийи муң ажыг чылдар бурунгаар, аңгы-аңгы үелерде, ай санаашкынының ол хүнүнде, үш болуушкун болган: Шакьев ызыгуурлуг хаанның өг-бүлезинге Будда төрүттүнген, ол 36 харлыында чырыткылыг угаан четкен база 81 харлыында нирванаже аъттанган.

 Россияның болгаш делегейниң буддистери байырлалдың ол хүнүнде улуг номчулгаларга киржип, өргүлдү өргүүр. 

  Найысылалдың кол шөлүнге, май 21-де, Тывада буддийжи философияның эдерикчилерин база шупту чүдүкчүлерни байырлалга келирин чалап тур. 12 шакта орус база тыва дылдарда байырлалдың хемчеглери эгелээр. Тываның Камбы-ламазы бир шак ажыг үе иштинде номну номчуур. Номнал соонда 1000 ак кадакты өргүлге сунары - байырлалдың көрүштүг кезээ болур. 

 Ол-ла үеде, Арат шөлүнге, Тыва культура төвүнүң ажылдакчылары тыва национал оюннарның мөөрейлерин эрттирер. Оон аңгыда ак чемнер кылырынга мастер-класстарга күзелдиг кижилер киржип болур. Тыва Республиканың база Кызыл хоорайның чогаадыкчы коллективтериниң концерти-биле байырлал доостур.

  Ай санында-ла ай санаашкыны-биле 15-тиң хүнүн ыдыктыг хүн деп санаар. Ол хүнде кылган буянныг үүле муң катап арбыдап көвүдээр. Бо 2016 чылда ол хүн майның 21-де таваржып, үш дакпыр байырлал кылдыр капсырлашкан. Ынчангаш ол хүннүң чаагай үүле-херээ миллион катап көвүдээр ужурлуг. Буддизмниң өөредиин эдерип, ооң сагылдарын сагып чоруур кижилерге ол хүн езулуг ыдыктыг хүн болур. Делегейниң болгаш Тываның шупту хүрээ-хииттеринге улуг номналдар эрткилээр. 

  Республикада буддийжи ыдык ай майның 7-де эгелээнин сагындыраал.