Тывада өскүс уругларны чаа бажыңнар-биле хандырары уламчылавышаан

 Тиилелге хүнүнүң бүдүүзүнде, Каа-Хем суурнуң Пригородная кудумчузунда хөй квартиралыг чаа бажың ажыглалга киргенин сагындыраал. Ол бажыңның баштайгы чурттакчылары май 8-те эргижирээн оран-саваларындан ынаар көжүп кирген. Майның 16-да ТР-ниң Өг-бүле база уруглар херектериниң талазы-биле агентилелдиң төлээлери өскүстер оочурунда турар 9 кижиге чаа квартираларның дүлгүүрлерин дамчыткан. 

 Ол хүн чаа бажыңче көжүп кирген аас-кежиктиг кижилерниң эң улуу Татьяна Сарыглар бажың алырын 26 чыл манаан. Дүлгүүрүн ап тура, ол өөрүшкүзүн өскелер-биле үлешкен:

  - Школа-интернатты доозуп тура, бажыңны ап болурумну билбес турдум. Чүгле башкы институдун доозупкаш, оочурга туруп алган мен. Ам бөгүнде бодум бажыңныг болганымга, канчаар-даа аажок өөрүп тур мен. 

  Оочурга 30 чыл турган Мария Чурукай база бажың чок элээн бергедешкен. 1986 чылда школа-интернатты дооскаш, амыдыралдың делгем оруунче чүгле бышкан билигниң аттестадын алгаш кирген:

 - Баштай ниитиниң чуртталга бажыңынга, оон хөлезилээн бажыңга чурттап чорудум. Берге үелер тургулаан, мындыг хүн чедип кээр деп, черле бүзүреведим. Дыка өөрүп тур мен. 

 Артур Хисматуллин өскүс дээш оочурга 20 чыл – 1996 чылдан бээр турган. Мария Чурукай ышкаш, баштай общежитиеге, Бурятияның демир-орук шугумунга ажылдап тургаш – албан бажыңынга, оон чанып келгеш, Кызылдың шупту булуңнарынга квартиралар хөлезилеп чурттап турган. Чаа бажыңның квартиралары делгем болганынга Артур таарзынган. «Маңаа телевизорну, борта соодукчуну, дуу аңаа плитка тургузар боор мен» - деп, баш бурунгаар даап бодап алган. 

  2016 чылда өскүс болгаш ада-иезиниң хайгааралы чок арткан 176 кижини бажың-биле хандырары көрдүнген. Сөөлгү чеди чылдың дургузунда 1259 өскүс кижи чурттаар черлерни алган. 2016 чылдың эге айында ол категориядан 4017 кижи бажың оочурунда турар, оларның 2995-жи 18 хар чедип, халас чурттаар чер алыр эргелиг апарган. Оларның хөй кезии, азы 1457 кижи - Кызыл хоорайның чурттакчылары.