«Кызыл» аэропорту федералдыг аэропорттар даңзызынче кирген

 Тываның кол аэропорту «Кызыл» федералдыг эрге-байдалдыг аэропорттар санынче кирген. Россияның Чазааның даргазы Дмитрий Медведев, апрель 20-де, ооң дугайында айтыышкынга атты салган. 

 Аэропорттарның ол даңзызынче «Кызыл»-биле кады 91 аэропорт кирген. Ооң санында, Москва база Санкт-Петербург хоорайларның федералдыг – 4, регионнар найысылалдарында делегей чергелиг – 57, РФ-тиң субъектилериниң административтиг төптеринде делегей статузу чок – 13, база регион төптеринге хамаарышпас 17 делегей чергелиг аэропорттар бар. 

  Делегей авиашугумнарын ажыдарынга кандыг-даа хевирниң агаар судноларын хүлээп алыр аргалыг, ужудуп-хондурар шөлдү чаартыр ажылдар «Кызыл» аэропортунда 2015 чылда-ла эгелээн. 1974 чылда сөөлгү катап капиталдыг септелге кылган ол 2700 метр шөлдү чаартырынга ниитизи-биле 1 млрд. 50 млн. рубль херек. Аэропорт ажыл-агыйын бүрүнү-биле эде чаартырынга 3 млрд рубль үнер, ол ажылдарны 2017 чылда доозар ужурлуг. Ужудуп-хондурар шөлдү чаартырындан аңгыда, чырыктар-биле оруктарны дериири, кывар-чаар чүүлдер-биле куттунарының хемчээлин улгаттырары, делегей чергелиг терминалды тургузары, чер кырының инфраструктуразын шөйери – чаартылга ажылдарында кирип турар. 

 2008-2009 чылдарда аэропорт буураарының кырынга келген турганын сагындыраал. Тываның Баштыңы Шолбан Кара-оол ону камгалап арттырар талазы-биле хемчеглерни ап, баштай регион, оон федералдыг өнчүже шилчидип, бүдүрүлгени болгаш специалистерни хевээр арттырган.