Тываның Баштыңы Кызыл хоорайда, хоруттунган үеде, арага садып турар садыгларны онза хыналдага алырын негээн

 Понедельникте, чазак кежигүннери болгаш кожууннар удуртукчулары-биле аппарат хуралында, Тываның Баштыңы Шолбан Кара-оол Кызыл хоорайда, хоруттунган үеде, арага садып турар садыгларны онза хыналдага алырын негээн. 

 Ол садыглар кымга хамааржырын илередирин, ындыг садыг точкалары-биле демисел канчаар чоруп турарын тодарадырын оралакчызы Анатолий Дамба-Хууракка онааган. 

 Кайда-даа «Байкал» деп садыгның база өске-даа объектилерниң дугайында чугаалар чоруп турар. 

 ТР-ниң ажыл-чорудулганың чамдык хевирлеринге чөпшээрел бээр болгаш хайгаараар албан чогуур хыналда ажылдарын чорудар херек.

  Республикада хондур-хүнзедир ажылдаар 2-12-94 дугаарлыг изиг шугум телефону ажылдап турар. Ынаар шынары багай арага садып турар ийикпе азы, арага садарының чурумун хажыдып турар факт-барымдааларны дыңнадып болур. 

 «Ниитилелдиң санал-оналы болгаш негелделеринче кичээнгейни угландырыңар» - деп, Тываның Баштыңы Шолбан Кара-оол чугаалаан.