15.12.2015
Россияның Хөй-ниити палатазының кежигүнү: Тываның Баштыңының Айыткалы дыка дээштиг-дир Декабрь11-де Тываның Баштыңының Дээди Хуралга Айыткалын республиканың хөй-ниитизи сайгарып турар.
Эльвира Лифанова, Россияның Хөй-ниити палатазының кежигүнү:
- Шупту чүүлдерни кижилерже, республикаже угландырган дыка дээштиг айыткалды бөгүн дыңнадым. Тываның Баштыңы айыткалында кижилерниң – уругларның, хөй ажы-төлдүг өг-бүлелерниң, школачыларның, студентилерниң, сайгарлыкчыларның амыдырал-чуртталгазының шынарын экижидеринче угланган эрге-чагырганың ажылдарынче улуг кичээнгейни салган-дыр.
Мээң бодалым-биле алырга, эрге-чагырганың муниципалдыг органнары бодунуң ажыл-херээн эгелээр чүткүлдүг кижилерге дузалажып, сайгарлыкчы ажыл-чорудулганы боттарының деңнелинге хөгжүдер дээни чугула чүүл болду. Чоокта чаа МИЧ-терге шынга дүүшпес, Тываны туризмге сонуурганчыг эвес регион деп парлаан чүүлүнге Тываның Баштыңы дыка дораан харыыны берип, 2016 чылды Тывага Аалчыларның чылы кылдыр чарлады.
Ол чыл Тывага туризмни оон-даа улам сайзырадырынга база бир чугула быра апаарынга бүзүрээр мен.
Чимит-Доржу Ондар, тудуг адырының хоочуну, хөй-ниити болгаш күрүне ажылдакчызы:
- «Кыштаг» аныяктарны кыйгырып турар-дыр! Тывада чер чеже-дир, а чүгле ажылдаар күзел херек! Оон аңгыда, күрүне деткимчени база берип турар, 200, 100, 50 баш хойну алгаш, өстүрүп, азыра, өг-бүлеңни хандырып, байы – Тываңга, Россияга ажыктыг чүүлден эккел. Тываның Баштыңының мал ажыл-агыйын деткиир дээнин бүрүнү-биле чүүлдүгзүндүм – ол республиканың келир үезинче стратегиктиг көрүш-биле тургускан дыка бодамчалыг базым-дыр.