Тываның Камбы-Ламазы биле Кызылдың болгаш Тываның Епискову Феофан республика Баштыңының Айыткалын тайылбырлаан

 Тываның Баштыңы Шолбан Кара-оолдуң Дээди хуралга декабрь 11-де берген Айыткалын республиканың хөй-ниитизи тайылбырлаан. 

 Кызылдың болгаш Тываның Епискову Феофан: - Тываның Баштыңының Айыткалында, бирги ээлчегде, бистиң республикавыска, тыва ниитилелде амыдыралдың бүгү адырларында чидиг айтырыгларны дес-дараалаштыр шиитпирлээн аргазын демдеглекседим. Россияның Президентизиниң Федералдыг Хуралга Айыткалының темазы-биле регионнуң удуртукчузунуң чугаазы чүүлдеш-даа болза, бистиң республиканың онзагайы, хөгжүлдези болгаш келир сорулгаларын айыткан илеткелде Тываның чурттакчыларының дугайында болган. Ынчангаш Тываның Баштыңы республиканың чурттакчыларын деткииринче, санал-оналдарны деткииринче угланган адыр бүрүзүнде чаа ажыл-херектер болгаш чаа төлевилелдерни тодараткан. Шолбан Валерьевичиге, Тываның Чазаанга Айыткалда айыттынган бодалдарны боттандырарын сеткилимден күзээр-дир мен. Республиканың чурттакчыларынга эрге-чагырганың чаа төлевилелдеринче идепкейлиг базымны кылырын күзедим. Кандыг-даа ажыл-херекте чедиишкиннерни чүгле демниг хөделиишкиннер-биле чедип ап болур. 

 Тываның Камбы Ламазы Лопсан Гьятсо: - Тываның Баштыңы Шолбан Валерьевич Кара-оолдуң Айыткалында бистиң республиканың хөгжүлдезинде эң-не кол чүүл – мал ажыл-агыйында малчыннаар дээн аныяк кижилерни деткиир дээни-дир. Республикага эң-не берге 90 чылдарда боттары мал-маганныг, ажыл-агыйлыг кижилер бергелерни тоор хире эвес эрте бергенин билир бис. Бөгүнде, чуртта база амыр эвес үелер турза-даа, Тываның Баштыңы аныяк кижилерге деткимче көргүзер дээни кризиске удур чугула хемчег-дир деп, санаар мен. Шолбан Валерьевичиниң Айыткалын бүрүнү-биле деткип тура, Тываның оон-даа ыңай хөгжүлдези болгаш чурттакчы чонунуң чаагай чоруу дээш республиканың эрге-чагыргазының бүгү-ле адырларда дээштиг ажыл-чорудулгазын демдеглейн.