19.11.2015
РФ-тиң регионнарының аразынга Россияның Президентизиниң "Үр хуусаалыг күрүнениң экономика политиказының дугайында" №596 чарлыын боттандырарының рейтингизинде Тыва 10-гу черни ээлээн. Москва, Ульяновск область база Хабаровск край ону баштап турар болза, «Медиалогияның» эксперттери Сибирь федералдыг округтуң регионнарындан Тываны топ-10-нуң санынче киирген.
2015 чылда инвестицияның идепкейлиг чоруун артырып алганы республикага рейтингиниң бедик туружун хандырган деп, эксперттер санап турар. Тыва бо чылын полиметаллдар рудазын казып тывар даг-тывыш комбинадын ажыглалга киирген, Межегей хөмүр-даш чыдынында шахта болгаш бүдүрүлге объектилериниң, ол ышкаш гостиница комплекизиниң, бетон болгаш тууйбу заводтарының тудугларын калбарткан.
Оон аңгыда Тыва бо чоокку чылдарда боттандырар ужурлуг ажылдарны эгелээн – "Внешэконом" банк биле «Союз» энерготудуг холдингизин хаара тутпушаан, Кызылга 300 МВт күчүлүг чылыг-чырык-станциязын тударының төлевилел ажылдары эгелээн. Ыяшты бүрүнү-биле болбаазырадыр бүдүрүлгени тударының төлевилелин ажылдап кылып турар. Эът болбаазырадыр кластерниң кол өзээ - чылда 2 муң ажыг тонна эът бүдүрер эът комбинадын күрүне-хуу эштежилге керээзи-биле октябрьда тудуп эгелээн.
Тываның экономиказы турум хөгжүлдеде дээрзин РФ-тиң Экономиктиг хөгжүлде яамызы айыткан. РФ-тиң Экономиктиг хөгжүлде яамызының белеткээни, 2016 чылда база планныг 2017 биле 2018 чылдарда Россия Федерациязының социал-экономиктиг хөгжүлдезиниң дугайында төлевилелде республика хөгжүлдезиниң чогумчалыг угланыышкыннарынга ажыктыг казымалдарны казып-тывар ажыл-чорудулганы калбартып, чаа тывыш черлерин саарылгаже киирери-биле холбаан.
Экономика адырында В. Путинниң «май чарлыктарын» боттандырар талазы-биле РФ-тиң 10 топ-регионнары ("Үр хуусаалыг күрүнениң экономика политиказының дугайында" №596 чарлыы-биле, регионнуң ады, медиаиндекизи):
1. Москва хоорай - 346,84;
2. Ульяновск область - 277,61;
3. Хабаровск край - 261,03;
4. Липецк область - 151,16;
5. Дагестан - 130,61;
6. Мурманская область - 63,34;
7. Саха (Якутия) - 55,21;
8. Пермь край - 50,37;
9. Татарстан - 44,26;
10. Тыва Республика - 35,07.