17.11.2015
Республиканың чурттакчы чонунуң бадылааны-биле «Улусчу участок шагдаазы» атты Эрзин суурда полицияның № 11 пунктузунуң шагдаазы Артем Сараагай чедип алган. Моол-биле кызыгаарда Эрзин кожууннуң Мөрен суурга төрүттүнген болгаш моол дылды эки билири, ооң ажылынга дузалыг. Бай-Даг, Булуң-Бажы база Нарын суурлар ооң харыылаар девискээринге хамааржыр.
Республиканың Баштыңы Шолбан Кара-оол-биле ужуражылга үезинде 32 харлыг Артем Сараагай бодунуң ажылын таныштырган. Ооң мурнунда малчын коданнар аразынга аргыжылга берге турган болза, «УАЗ-Патриот» маркалыг албан автомашиназын алганы - ажылга дөгүм. Кышкы үе чоокшулаарга тывалар чиш белеткеп эгелээрге, полицейжиниң ажылы чымыштыг. Ол үеде мал оорунуң саны көвүдээр, малды чүгле одардан эвес, а кажаадан безин алгаш баар таварылгалар бар.
Мал оорлаашкыны, хоойлуга чөрүштүр кылымал арага садыглаашкыны, хөй-ниити органициялары болгаш көдээ школаларның удуртулгазы-биле кем-херек үүлгедиишкининге удур ажылдар дугайында Тываның Баштыңы айтырган.
Кожуунда Адалар чөвүлели-биле кады, хосталып келген кижилер катап чурум хажыдыышкыны кыла бербес кылдыр, профилактика ажылын сырый харылзаалыг чорудуп турарын участок төлээзи чугаалаан.
Элээдилер-биле ажылга башкыларны, ылаңгыя школа директорларының оралакчыларын хаара тударын Шолбан Кара-оол сүмелээн.
«Чурттакчы чон-биле он хире чыл мурнуку одуругда чоок ажылдап турар болгаш, оларның чидиг айтырыгларын дыка эки билир силер. Эң-не кол чүве, чоннуң бүзүрелин чаалап алган-дыр силер. Ак сеткилдиг ажылыңар дээш өөрүп четтирип, чонну ижиртип, ооң-биле кем-херек үүлгедиишкиннеринче ыдалап турар чажыт арага садыгжылары-биле сыныш чок демиселге кады демниг ажылдаар боор бис. Чурттакчы чон ортузунга эрге-хоойлу талазы-биле чырыдыышкын ажылын чорудар бис. Республикада соталыг телефон оорлаары 61 хууга өскен. Оор чорук, чижээ, телефон оорлаары кеземчеге онаажыр кемниг үүлгедиишкин-дир дээрзин школачыларга тайылбырлаар» - деп, республиканың баштыңы чугаалаан.
Регионнуң удуртукчузу Шолбан Кара-оол биле полиция пунктузунуң бүрүн эргелиг төлээзи Артем Сараагай кады ажылдажылганы дугурушкан.
«Муниципалдыг эрге-чагырга болгаш хөй-ниити институттары-биле кады элээн сырый болгаш демниг кады ажылдаалыңар. Республиканың кызыгаар Эрзин кожууну элээн демниг болуру чугула. Чедиишкиннерни күзевишаан, силерниң чурттакчы чоннуң үзел-бодалдарынга дыңнангыр чорууңар, бедик харыысалганы медереп билириңер - албан хүлээлгеңерге дүрген депшиир арганы бээр болзун» - деп, республиканың баштыңы демдеглээн.