Тываның Баштыңы биле Россияның тускай тудуунуң директору РФ-тиң Камгалал яамызының тудугларын хынаан

 Сентябрь 18-те Россияның тускай тудугнуң директору Александр Волосов ээлчеглиг ажыл-агыйы-биле Тывага кээп чораан. Ооң келген чылдагааны - Кызылда шериг хоорайжыгажының тудуг ажылдарының чорудуу-биле таныжары болган. Тудуг шөлдерин регионнуң удуртукчузу Шолбан Кара-оол-биле кезип, көрген.

 РФ-тиң Камгалал яамызының чагыы езугаар, Кызылда өске шериг объектилериниң тудуу-биле чергелештир, амгы үениң, чиик, таарымчалыг, чаагайжыттынган чуртталга бажыңнары болгаш социал адырның тудуглары кирген чаа хоорайжыгашты тудуп турарын сагындыраал. Үени камнап алыры-биле тудуг шөлүнде пластик соңгалар, тууйбу, үүрмек сайны бүдүрүп турар. 

 300 хире гектар шөлге чогуур инфраструктурага коштунган ниитизи-биле 87 объект турар. Территорияны чуртталга, клуб-спорт, парк дээш, аңгы-аңгы угланыышкынныг зоналарга чарган. Төлевилелдиң документилерин ажылдап кылып тура, дөзевилекчилер Азияның чүрээнде чыдар республиканың найысылалынга дүүштүр келир үениң объектилеринге национал тускайлаң хевирни киирер дээн Тываның Баштыңының күзелин өөренип көрген.

 2014 чылдың август айда тудуг шөлүнге ажылдар эгелээн. Объектилерни кезип, тудугжулар-биле чугаалашкан соонда, Александр Волосов биле Шолбан Кара-оол ам дараазында ажылдарның чурумун дугуржур хуралды эрттирген. 

  Республиканың Баштыңы Шолбан Кара-оол бүдүрүлгеның баазазын улгаттырып, демир конструкция болгаш демир-бетон тудуг материалдарының бүдүрүлгезин эгелээрин сүмелээн. Өске регионнардан Тываже тудуг материалдары киир сөөртүрүнүң орнунга, ол элээн дээштиг болгаш чарыгдалы эвээш арга деп, ол санап турар. 

  Оон аңгыда тудугларже тус черниң кадрларын хаара тударын дилээн. Ынчангаш хостуг ажылчы олуттарны чурттакчы чонга чарлап, дыңнадыры чугула. 

  Найысылалдың чаа социал болгаш чуртталга комплекизинге, өзүлдениң чаа точкаларынга херек күчүлүг чуртталга-коммунал инфраструктураны шериг хоорайжыгажының девискээринге тудары чугула дээрзин, Шолбан Кара-оол аңгы демдеглээн. 

 Шериг хоорайжыгашка уруглар сады биле школаны албан тудар деп, РФ-тиң камгалал сайыды-биле дугурушкан айтырыгны боттандырарын, регионнуң баштыңы дилээн. Тываның Баштыңының көдүрген айтырыгларынга кады билчилге чедип алдынган.