Кызылдың аэропорт комплекизин 1 млрд. рубльге эде кылыр конкурсту чарлаан
26.08.2015
Тывада чаңгыс аэропорт «Кызылдың аэропорту» федералдыг казна бүдүрүлгези аэропорт комплекизин эде тудар талазы-биле конкурсту среда чарлаанын, күрүне чагыының сайтызында дыңнаткан.
Садыглажылгага киржир чагыгларны сентябрь 15-ке хүлээп алыр, конкурстуң түңнелин сентябрь 22-де үндүрер.
Керээниң эге (үстүкү) өртээ – 1,06 млрд. рубль.
Тиилекчи компания 2017 чылдың декабрь 20-ге чедир ужудуп-хондурар шөлдү эде кылып, пассажирлер перронун база агаар судноларының техниктиг хандырылгазын чорудар черни чаартып, энергохандырылга системазын, сигнализация, харылзаа болгаш арыглаашкын дериг-херекселдерин, элээн каш тудуг-монтаж ажылдарын доозар ужурлуг.
Төлевилелдиң акшаландырыышкынын федералдыг бюджеттен бээр: 2015 чылда - 291,6 млн. рубль, 2016 чылда – 486,05 млн. рубль, 2017 чылда – 282,3 млн. рубль.
Тываның Баштыңы Шолбан Кара-оол регионнуң кара чаңгыс аэропортун модернизастаар санал-биле Россияның Президентизинге болгаш РФ-тиң Чазаанга чаңгыс эвес удаа кирген. Август 17-де туризмни хөгжүдер талазы-биле Күрчөвүлелдиң хуралында Ш.Кара-оол: "Кызылдың аэропортунуң хөгжүлдези 1974 чылдың деңнелинде хевээр арткан, бир эвес ужудуп-хондурар шөлдү чаартпас болза, туризмниң хөгжүлдезин чедип алыры болдунмас» деп дыңнаткан.
РФ-тиң Чазааның бадылааны 2025 чылга чедир Тыва Республиканың социал-экономиктиг хөгжүлдезиниң программазынче Кызылдың аэропортун чаартыр төлевилел кирген.
Возврат к списку
|