Уруглар туризминиң Улуг Тиилелгениң 70 чылынга тураскааткан акцияны «Тиилелгениң маршруттары» культура-билиишкинниг национал программазының боттанылгазы-биле Культура яамызы чорудуп турар. Тываның школачылары Жуков хоорайда совет шериглерниң маадырлыг эрткен черлеринге чедип, «Ильинские рубежи» шериг-төөгү музейин сонуургап, Калуга биле Тула хоорайларга таныштырылга экскурсияларга киржир аргалыг. «1941-1945 чылдарда Ада-чурттуң Улуг дайынында Москва» деп хоорайга автобустуг экскурсия уругларны чалап турар. Оон аңгыда уругларга Мөгейиг даанда 1941-1945 чылдарның Ада-чурттуң Улуг дайынының Төп музейин, Бункер-42-ни, «Таганск» Курлавыр Командылал Пунктузун, «Мосфильм» киностудияны сонуургадыр.
«Артывыста Москва!» турга киржир уругларның чыылдазын (квота – 66 кижи) Тыва Республиканың Туризмниң информастыг төвү чорудуп турар. Баар чери: Кызыл хоорай, Щетинкин-Кравченко кудумчузу, 46.
Маршрутка киржир уругларның чарыгдалын федералдыг бюджеттен акшаландырар. Уругларның баар-кээриниң орук өртээн ада-иелер төлээр.
Ол программа-биле 16 уруг биле 3 удуртукчулуг бирги бөлүк март айда Санкт-Петербург хоорайга четкенин сагындыраал. Турисчи маршрут-биле олар Ленинград облазында Ладогада амыдыралдың оруу, Осиповец суурда «Амыдырал оруу» музей, «Чуртталганың чечээ» мемориал-биле танышканнар. Оон аңгыда соңгу найысылалда Күрүне Эрмитажында уран чүүлдүң чогаалдарын сонуургап, хоорайның ниити таныштырылгазын көргеннер.
Туризм төвү республика иштинде аңгы-аңгы турисчи маршруттарны база сүмелеп турар. Оларның эң-не нептереңгейинге - Кызыл хоорайга таныштыралга экскурсияны хамаарыштырып болур. Тыва биле Моолдуң туризм адырында делегей чергелиг кады ажылдажылгазы-биле, «Убса-Нур ыйгылаажы» бойдус заповеднигиниң эко-школазынче чалааны, бойдус камгалалының акцияларынга болгаш конкурстарынга тиилээн уругларга республиканың найысылалынга август 7-де турну организастаар. Дериттинген майгын лагеринге 34 өөреникчи келир, оларның 10-у Моолдан, 13-ү Мөңгүн-Тайгадан, 11-и Бай-Тайгадан. Школачыларның ол бөлүүн Убса-Нур заповедниги биле Бойдусту камгаларының бүгү-делегей фондузу деткээн.
Сентябрьда, Туризм хүнүнде, Кызылга тускайлаттынган ачы-буян туру база эртер. Кызылдың школа интернадындан, хоорайда чогумчалыг эвес өг-бүлелерден болгаш инвалид уругларга ол турну республиканың Культура яамызының Туризмниң информастыг төвү биле Өг-бүле болгаш уруглар херектериниң талазы-биле агентилел организастаар.