Тываның аалчылары: «Үстүү-Хүрээ» соонда чуртталга эки талазынче өскерлир дээр

 Бо чылын «Үстүү-Хүрээ» дириг хөгжүм болгаш чүдүлге фестивалын дыка хөй аалчылар сонуургаан. Чадаана хоорайдан ырак эвесте майгыннар лагери чаттылыпкан. Ында хондур-хүнзедир хөгжүм чаңгыланып, хөглүг каткы дыңналып, концерттер хөйнүң кичээнгейин хаара туткан. Фестивальдың аалчылары сагыш-сеткили-биле үлешкеннер: 

«Аалчы болуп ийи дугаар кээп тур мен. Силерде дыка онза-дыр, бойдус чурумалы база кайгамчык. Бо чылын фестивальды организастаанын, майгын лагерин, стадионну болгаш сценаны дерээнин демдеглексеп тур мен. Ам хүрээ биле өглер хоорайжыгажы чедеривис ол. Чаңгыс байырлалга келгеш, дораан-на үш улуг хемчегге таварышканывыска өөрүп тур бис».

 «Мында үш дугаар чыл келдивис. Бо чылын организация тергиин-дир. Дыштаныр уруглар эккелдивис, мында арыг болгаш «күчү-күштүң» черлери хөй. Бөлүүвүсте 20 кижи бар. Келир чылын албан кээр бис». 

 «Фестивальда бир дугаар келдим. Мында бажыңда ышкаш байдалды таарыштыр тургусканынг атаарзындым. Шупту чүве эки-дир, чылыг болгаш өөрүнчүг. Дүүн аът чарыжынга чордувус. Каас-коя аътта национал хептиг, өндүр улуг, чараш аът мунукчузун көргенивис - уттундурбас сактыышкын бооп арткан. Хүрешке база бардывыс. 

  Дүнеки одаг, дүмбей дээр, сылдыстарга чедип турар ышкаш, дээр шаар чаштаан көстер. Оон ыңай, дыка эрте чер чырып кээр-дир. Кайгамчык чурумал. Ооң мурнунда фестивальга кээп чораан мээң таныыр кижилерим, «Үстүү-Хүрээ» соонда чуртталга эки талазынче өскерли бээр дээр. Ону бодумга шенеп көөр дээш келдим». 

 Алена Саая, Вероника Ооржак, Кызыл хоорайдан өөреникчилер: 

 «Маңаа дыка таарзындывыс. Аңгы-аңгы чурттардан болгаш регионнардан хөй кижилер чыылган болгаш, сагышка тааржыр кижилерниң аразынга хөгжүм дыңнап, чугаалажып, үени солун эрттирери - арга-дуржулга солчулгазының эң-не эки аргазы-дыр. «Салчактың студиязы» коллективтиң составында, фестивальдың киржикчилери бис. Ритм-гитарада ойнап турар бис. График дыгый болганындан Наадым хемчеглеринге баары болдунмас-тыр. Мында кижилерниң ээлдек-эвилеңин, чазык-чаагайын демдеглекседивис». 

 Сайзана Артына, «Тоджа тур» турисчи компанияның аян-чорук менеджери:

 «Чадаанада эртип турар фестивальга ийи удаа кээп тур мен. Бир дугаарында, организация эки-дир дээрзин демдеглейн. Интернет четкизинче тускай удазын чокка кирип болур арганы тургусканы, мобильдиг телефоннар, фотоаппарат дээш өске-даа техника аймаа октап алыр розеткаларны кылганы дыка таарымчалыг. Арыгланып-чунар черни арыг-силиг кылдыр экижиткени, чараш сцена база шынарлыг хандырылга улуг «кадарны» немеп турар-дыр.

 «Үстүү-Хүрээниң» аалчылары база көвүдээн-дир. 

 Фестивальдың киржикчилеринге болгаш аалчыларынга «Тоджа тур» турисчи компания аңгы-аңгы турисчи маршруттарны сүмелээн. Июль 23-те «Үстүү-Хүрээ» хүрээзинге, Барыын-Хемчик кожуунда Бижиктиг-Хая, Үттүг-Хаяга база Чингис-Хаанга (Кижи көжээге) чедип, ооң кулаанга күзелдерин сымыраныксаан 5 кижилиг баштайгы бөлүктү аъткардывыс. Ол-ла маршрут-биле бир бөлүк ооң соонда үнер. Тожу кожуунче турисчи турнуң баштайгы аян-чорукчулары фестивальдың бирги хүнүнде-ле демдеглеткен. РФ-тиң өске регионнарының чурттакчыларының сонуургалын республикавыстың тураскаалдыг черлери болгаш бойдузу хаара туткан.