Россияның Президентизи Владимир Путин Тываның Баштыңынга төрүттүнген хүнү-биле байырны чедирген
19.07.2015
Россияның Президентизи Владимир Путин Тываның Баштыңы Шолбан Кара-оолга төрүттүнген хүнү-биле байырны хүннүң ийиги чартыында телефон дамчыштыр чедиргеш, бүгү-ле чүүлдерге болгаш ажыл-ижинге чедиишкиннерни күзээн. Регионнуң Баштыңы Шолбан Кара-оол Россияның Президентизинге кичээнгейни угландырган чылыг чымчак сөстери дээш өөрүп четтиргенин илереткен.
Шолбан Кара-оолга РФ-тиң Чазааның Даргазы Дмитрий Медведев телефон дамчыштыр харылзашкаш, сорулгалары күүсеттинип чоруурун, быжыг кадыкшылды, бедик хей-аътты база күзээн.
РФ-тиң камгалал сайыды Сергей Шойгу хөглүг баштак байыр чедириишкинин, эң-не кол чүве – кадыкшылды, омак-хөгнү даң бажында-ла дамчыткан.
Республика Баштыңының адынга федералдыг структураларның удуртукчуларындан хөй санныг телеграммалар, Россияның регионнарындан губернатор эштеринден байыр чедириишкиннери хөйү-биле келген.
Тываның Баштыңы бодунуң төрүттүнген хүнүнде регионнуң Күрүне чөвүлелиниң хуралын чыып, аңаа республиканың муниципалдыг тургузугларының комплекстиг хөгжүлдезиниң түңнелдерин үндүрген.
Возврат к списку
|