Чылыг,чырык
26.12.2014
Чартык чүс чыл ажыг үениң дургузунда Кызылдың чылыг, электри төвү найысылалдың болгаш кожууннарның социал-экономиктиг амыдыралының кол дазылы болуп келген. Ол хире улуг күчү-күштүг бүдүрүлгеде дыка хөй кижилер дүне-хүндүс кызымаккай ажылдап турарлар. Чымыш иштиг энергетиктерниң декабрь 22-де профессионал байырлалынга ТР-ниң Чазааның Даргазының оралакчызы Владимир Фалалеев, Дээди Хуралдың депутады Алдын-кыс Конгар, ТР-ниң одалга болгаш энергетика сайыды Роман Кажин-оол чедиишкиннерни күзеп база мурнакчыларга өөрүп четтириишкинниң болгаш хүндүлел бижиктерни Орус культура төвүнге байырлыг байдалга тывысканнар.
Кандыг-даа байдалда боттарының мурнунда салган сорулгаларын ак сеткилдии-биле күүседип турар республиканың аңгы-аңгы кожууннарындан келген чамдык мурнакчылар ажылын таныштырды:
Раиса Мөгедир, Чеди-Хөлдүң чылыдылга төвүнүң хоочуну (чурукта): «Мен суурумнуң чылыдылга төвүнге 25 чыл дургузунда ажылдадым. Эрткен чылын хүндүлүг дыштанылгаже үндүм. Чылыгны, чырыкты харыылаар төпте ажыл берге болгаш кончуг харыысалгалыг. Бодумнуң арга-дуржулгамны аныяк-өскенге дамчыдып берип, эш-өөрүм-биле үргүлчү харылзажып турар мен».
Мерген Мартык-оол, Шагаан-Арыгның чылыдылга төвүнүң машинизи: «Улуг-Хемниң чылыдылга төвүнде сес дугаар чыл ажылдап тур мен. Кызылдың автоорук техникумун доозупкаш келгеш-ле, бо төпке ажылдап эгелээн мен».
Алексей Ооржак, Шагаан-Арыгның чылыдылга төвүнүң машинизи: «2011 чылдан эгелеп бо төпке ажылдап эгеледим. Эге дээрезинде аныяк кижиге меңээ берге болду. Аравыста хөй чылдарда ажылдап чоруур хоочуннарның арга-сүмезин ап чор мен».
Бистерниң бажыңнарывыста доктаамал чырыывыс база чылыывыс дээш улуу-биле өөрүп четтиргенивисти илередир-дир бис.
Возврат к списку
|