Тываның Баштыңы Владислав Ховалыг Өвүр кожууннуң Солчур суурдан бичии Хая Дамбыы-биле ужурашкан. «Күзелдер Ёлказы» бүгү-российжи акция чорудуу-биле Чаа чыл байырлалының бүдүүзүнде республика баштыңындан тывызык белекти алырын ол күзээн.
«Ооң мээң ажылымга улуг сонуургалы болгаш хөглүг чоруу бөгүн меңээ чылыг, чымчак бодалдарны оттурду. Уругларның күзелдери боттаны бээрге, оларның карактары канчаар чырып турарын көөрү - меңээ дыка үнелиг. Мындыг үелер уруг бүрүзүнүң боттанган күзели чүгле белек эвес дээрзин сагындырып турар. Ол дээрге уругнуң төрээн республиказында оларны долгандыр турар энерел болгаш сагыш човаашкынга бүзүрелинге чугула үлүг-хуузу-дур» - деп, республика Баштыңы Хая база ооң ачазы-биле ужурашкан соонда чугаалаан.
Хая 2 класстың өөреникчизи, сонуургалдары хөй. Ол чүгле чуруурунга, ырлаарынга эвес, а бичии дуңмазын карактажып, номнар номчуп, солун оюннар ойнадырынга ынак. Республиканың Баштыңы аңаа бистиң чуртувустуң эң-не чараш бойдустуг черлеринге тураскааткан «Россияны ажыдып турар» деп фотоальбомну болгаш улуг чуруттунар белекти берген.
Луганск Улус Республикада шефте алганы Червонопартизанск хоорайда «Спутник» уруглар садының уругларынга база белектерни чедирген. Тускай шериг операциязының талазы-биле тускай төлээ Тимур Куулар Владислав Ховалыгның болгаш Тываның чурттакчыларының өмүнээзинден уругларга байырны чедирип, чигирзиг белектерни сөңнээн.
«Силерниң ачыңар-биле уруглар тоолдарга база катап бүзүрээр апарган. А Соок-Ирейге бүзүревейн турган уруглар, ол бар-дыр, бистиң садывыска кээп чорду деп чугаалааннар. Энерел сеткилиңер, сагыш човаашкыныңар база профессионал чорууңар дээш четтирдивис» - деп, уруглар садының башкызы оларга өөрүп четтиргенин илередип, уругларның ада-иезиниң өөрүп четтириишкинин база дамчыткан.
2024 чылда Тываның ачы-дузазының ачызында ол уруглар садынга улуг септелге ажылдары кылдынганын демдеглээри чугула. Бо чылдың апрельде республиканың Баштыңы Владислав Ховалыг шефте алганы уруглар садынга барып, коллектив болгаш чаштар-биле ужурашкан.