Дүүн Владислав Ховалыгның удуртуп эрттиргени Тыва Республиканың Чазааның хуралынга, бөрү аңнааны дээш шаңналды эде көөр дугайында шиитпир хүлээп алдынган. Республиканың дириг амытаннар камгалаар күрүне комитединиң специалистериниң саналы-биле алырга, бөрүлерниң көдээ болгаш аңныыр ажыл-агыйынга чедирген экономиктиг когаралын эвээжедиринге, а ол ышкаш калчаа аарыын болдурбас дээн эпизоотиктиг деңнелди хайгаарап, база чоннуң кадыкшылын болгаш айыыл чок чоруун камгалаар сорулга-биле улуг бөрүнү чок кылганы дээш акша төлевириниң хемчэлин улгаттырары чугула.
«Ылаңгыя малчыннарның мал-маганынга бөрүлер халдаашкыны онза айыылды тургузуп турар. Хемчеглер тодаргай эки түңнелдерни берзе-даа, кокайларның санын өйлеп-таарыштырар ажылдарны ам-даа күштелдирер херек» - деп, Владислав Ховалыг бодунуң Телеграм каналынга демдеглеп, бөрүнү чок кылганы дээш ооң төлевирин 2026 чылдан тура 8 муң рубльден 10 муң рубль чедир көвүдедир дугайында шиитпир хүлээп алдынганын дыңнаткан.
2025 чылда аңныыр курлавырының кышкы оруунуң санааныдан алырга, республика девискээринде 992 бөрү бар болган. Эртемденнерниң болгаш специалистерниң саналы-биле алырга, 14 миллион ажыг гектар черни ээлеп турар регионнуң аңныыр шөлдеринге бо чүүл таарымча чок. Тываның Чазаа 2025-2027 чылдарда аңныыр болгаш көдээ ажыл-агыйга хора чедирбези-биле, республика девискээринде бөрүлер санын өйлээр хемчеглер планын бадылаан. Ында чылдың-на кокайларның санын үндүрери, арга-дуржулгалыг аңчыларлыг аглаашкын бригадаларын быжыглаары, оларны аглаар дериг-херекселдер, транспорт болгаш одаар чүүл-биле хандырары дээш, оон-даа өске элээн аргалар кирген.
2026 чылдың республика бюджединде 445 кокайны чок кылыры дээш 4,6 млн. рубль акшаны тускйалаан. Ол акша түңүнче 50 бөрзектерни узуткаар шаңнал база кирген, бир башка 3000 рубль.
2025 чылдың ноябрь 28-ке чедир республикада 376 бөрүнү чок кылган.