Уругларга белек

«Буянныг 100 ажыл-херек»

Эрткен неделяда Россия биле Тываның демнежилгезиниң 100 чылынга “Буянныг 100 ажыл-херек” деп акцияга даянып, Республиканың өкпе аарыгларынга удур диспансерниң девискээринге «Челээш» деп бичии уруглар шөлчүгежиниң байырлыг ажыдыышкыны болган.  Ону Кызылдың 5 дугаар гимназиязының өөреникчилери болгаш ада-иелер 33 муң рубльди чыггаш, тургускан.

Кызыл кожааны кескен соонда, диспансерниң девискээрин аян киирип турар чайганыыштарга уругларның каткы-хөглүг үннери дораан-на чаңгыланып, улуг өөрүшкү-биле ойнап кирипкеннер. Хөй-хөй айлар дургузунда эмнедип турар уругларга ол улуг деткимче болгаш дүрген сегиириниң бир аргазы дээрзи билдингир. Диспансерниң эмчилери, уруглар энерел сеткилдиг деткикчилеринге өөрүп четтиргенин илереткен. Ук шөлчүгешти кылып тударынга Хеймер-оол Иргитович Сүге-Маадыр болгаш ооң бригадазының киирген үлүг-хуузу улуг. 

Кызылдың 5 дугаар гимназиязында чылдың-на «Көпеекчигеш» деп акцияны организастап, ачы-дуза чедирери чаңчыл болу берген.

Амгы үеде уруглар салбырында үр үе дургузунда 1,5 хардан 18 харга чедир 40 уруг эмнедип ап турар.

Шончалай  Ховалыг.