Россияның Маадыры Чалым Чулдум-оол чаңгыс чер чурттугларынга Улуг Тиилелгениң байырын чедирген

1941-1945 чылдарда Ада-чурттуң Улуг дайынынга тиилээниниң 79 чылын демдеглээн байырлал хүнүнде, Тыва Республиканың Чазааның даргазының оралакчызы – Москва хоорайда Тываның бүрүн эргелиг төлээзи Чечен Чоксум, Россияның Маадыры Чалым Чулдум-оол чурттуң найысылалында студент чаңгыс чер чурттугларывыс-биле Мөгейиг даанда Ада-чурттуң улуг дайынында мөчээннерниң тураскаалынга чечектерни салып, сактыышкынның мөгейиин кылган.

Россияның Маадыры, лейтенант Чалым Сюндюпович Чулдум-оол чурттуң найысылалында Кызыл шөлге эрткен Тиилелгениң улуг парадынга киришкен соонда, Улуг Тиилелге хүнү-биле чаңгыс чер чурттугларынга база дайынчы эш-өөрүнге байырын чедирген:

- Хүндүлүг чаңгыс чер чурттуглар! Улуг Тиилелгениң хүнү-биле байыр чедирип тур мен! Бир дугаарында, хоочуннарга быжыг кадыкшылды күзедим! Чырыткылыг бо хүнде, Ада-чурттуң Улуг дайынының киржикчилерин, хоочуннарны сактып, хүндүткелди илередип, мөгейип тур бис. Амгы үеде украин националистерни чылча шавар дээн дайынчы хүлээлгени күүседип турар бис. Ынчангаш дайынчы эш-өөрүмге боттарын камнаарын чагып, Тиилелге бистии болур деп, бо хүнде база катап чугаалаксадым.