Россияның Маадыры Буян Куулар чаңгыс чер чурттугларынга ТШО киржикчилеринге дузалажып чорууру дээш четтиргенин илереткен

Россияның Маадыры атка төлептиг болган гвардияның биче сержантызы Буян Куулар чаңгыс чер чурттугларынга видеобижимелди чоруткан. Ында тускай шериг операциязының зоназында шериглерже гуманитарлыг ачы-дузаны чорудуп, доктаамал деткип чорууру дээш, чаңгыс чер чурттугларынга база республиканың удуртулгазынга четтиргенин илереткен.

- Тускай шериг операциязының киржикчилери бистиң дайынчыларывыска дузазын көргүзүп чоруур шупту кижилерге, Тываның Баштыңы Владислав Товарищтайович Ховалыгга четтиргеним илереттим. Аңгы-аңгы черлерде албан хүлээлгезин эрттирип чоруур Тывадан оолдарывыс дайынчы машиналарны, чылыг идик-хептерни, эътти, гуманитарлыг дузаламчыны ап турарлар. Ол бүгү дээш четтиргенивис илереттивис – деп, сержант чугаалаан.

Буян Куулар 55-ки гвардейжи мотоадыгжы даг бригадазының разведка батальонунда хүлээлгезин күүседип турар. Ол тускай шериг операциязының шөлүнде дайзынның кол пунктуларынче, харылзаа белдиринче, үр үениң от тудугларынче база украин шериглерниң өске-даа чугула объектилеринче шавар халдаашкыннар чорудар дайынчы даалгаларны күүседип чоруур.

Россияның Маадыры Буян Куулар бодунуң видеобижимелинде бедик шаңналды алырынга хамаарылгалыг шупту кижилерни демдеглээн: «Чазактың өмүнээзинден база Россияның камгалал сайыды, бистиң чаңгыс чер чурттуувус, Россияның Маадыры Сергей Кужугетович Шойгунуң бодундан Маадырның медалын алыры, меңээ улуг аас-кежик болду. База ол ышкаш 55-ки мотоадыгжы дагжы бригаданың удуртукчу составынга база командиринге, мээң-биле кады дайынчы хүлээлгелерни күүседип чоруур шериг эштеримге четтиргеним илередип тур мен – деп, биче сержант чугаалаан. – «Алдын сылдыс» шаңнал – чүгле мээң эвес, а разведка ротазындан оолдарның болгаш командирлерниң ачы-хавыяазы-дыр».